ബുധനാഴ്ച ക്യാമ്പ് നൗവിൽ നടന്ന യുവേഫ വനിതാ ചാമ്പ്യൻസ് ലീഗ് ക്വാർട്ടർ ഫൈനലിന്റെ രണ്ടാം പാദത്തിൽ എഎസ് റോമയെ 5-1ന് പരാജയപ്പെടുത്തി ബാഴ്സലോണ വനിതകൾ. ഇന്നത്തെ ജയത്തോടെ അഗ്രിഗേറ്റ് സ്കോറിൽ 6-1 എന്ന സ്‌കോറിന് കറ്റാലൻ ടീം സെമിഫൈനൽ ഉറപ്പിച്ചു. 54,667ഓളം കാണികൾ ഇന്ന് കളി കാണാൻ എത്തിയിരുന്നു.
11-ാം മിനിറ്റിൽ സ്വീഡിഷ് ഫോർവേഡ് ഫ്രിഡോളിന റോൾഫോയുടെ മികച്ച ഷോട്ടിലൂടെ ബാഴ്സലോണ ഫെമെനി മുന്നിലെത്തി. 33-ാം മിനിറ്റിൽ ഡിഫൻഡർ മരിയ പിലാർ ലിയോണിന്റെ ഗോളിൽ ആതിഥേയർ ലീഡ് ഇരട്ടിയാക്കി. ഹാഫ് ടൈമിന് തൊട്ടുമുമ്പ് റോൾഫോ തന്റെ രണ്ടാം ഗോൾ നേടി, രണ്ടാം പകുതിയിൽ അസിസാത് ഒഷോല, പട്രീഷ്യ ഗുയിജാരോ എന്നിവർ കൂടുതൽ ഗോളുകൾ നേടി.
58-ാം മിനിറ്റിൽ അന്നമരിയ സെർടൂറിനിയിലൂടെ എഎസ് റോമ ഒരു ഗോൾ മടക്കിയെങ്കിലും ഇറ്റാലിയൻ ടീമിന് അത് ആശ്വാസ ഗോൾ മാത്രമായി.
