ചാമ്പ്യൻസ് ലീഗ് 2025-26 സീസണിൽ ആഴ്സണലിന് തകർപ്പൻ തുടക്കം. അത്‌ലറ്റിക് ബിൽബാവോയെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തിയാണ് ആഴ്സണൽ ഈ സീസണിലെ തങ്ങളുടെ ആദ്യ യൂറോപ്യൻ പോരാട്ടം വിജയകരമാക്കിയത്. പകരക്കാരായി ഇറങ്ങിയ ഗബ്രിയേൽ മാർട്ടിനെല്ലിയുടെയും ലിയാൻഡ്രോ ട്രൊസ്സാർഡിന്റെയും തകർപ്പൻ പ്രകടനങ്ങളാണ് ആഴ്സണലിന് വിജയം സമ്മാനിച്ചത്.
ആദ്യ പകുതിയിൽ ഇരു ടീമുകൾക്കും ഗോൾ നേടാനായില്ല. തുടർന്ന് 71-ാം മിനിറ്റിൽ മാർട്ടിനെല്ലി, ലിയാൻഡ്രോ ട്രൊസ്സാർഡ്, ജൂലിയൻ ടിംബർ എന്നിവരെ കളത്തിലിറക്കി ആഴ്സണൽ പരിശീലകൻ മൈക്കൽ അർട്ടേറ്റ തന്ത്രപരമായ നീക്കം നടത്തി. ഈ നീക്കം വിജയകരമായിരുന്നു. കളത്തിലിറങ്ങി നിമിഷങ്ങൾക്കകം ട്രൊസ്സാർഡിന്റെ പാസ്സിൽ നിന്ന് മാർട്ടിനെല്ലി ആഴ്സണലിന്റെ ആദ്യ ഗോൾ നേടി. തുടർന്ന് മത്സരത്തിന്റെ അവസാന നിമിഷങ്ങളിൽ മാർട്ടിനെല്ലിയുടെ അസിസ്റ്റിൽ നിന്ന് ട്രൊസ്സാർഡ് രണ്ടാം ഗോളും നേടി വിജയം ഉറപ്പിച്ചു.
കഴിഞ്ഞ സീസണിൽ സെമി ഫൈനലിൽ പുറത്തായ ആഴ്സണലിന് ഈ വിജയം ആത്മവിശ്വാസം നൽകുമെന്ന കാര്യത്തിൽ സംശയമില്ല. ഈ മാസം ഒക്ടോബർ 1-ന് നടക്കുന്ന അടുത്ത മത്സരത്തിൽ ഒളിമ്പ്യാകോസാണ് ആഴ്സണലിന്റെ എതിരാളികൾ.
