മാഞ്ചസ്റ്റർ യുണൈറ്റഡ് ഗോൾകീപ്പർ ആൻഡ്രെ ഒനാനക്ക് പേശിവലിവ് കാരണം ശനിയാഴ്ചത്തെ ഫിയോറന്റീനക്കെതിരായ സൗഹൃദ മത്സരത്തിൽ കളിക്കാൻ കഴിയില്ല. പ്രീ-സീസണിന്റെ തുടക്കം മുതൽ താരം കളിക്കളത്തിന് പുറത്താണ്, പ്രീമിയർ ലീഗ് സമ്മർ സീരീസും അദ്ദേഹത്തിന് നഷ്ടമായിരുന്നു. എങ്കിലും, ഓഗസ്റ്റ് 17-ന് നടക്കുന്ന പ്രീമിയർ ലീഗ് മത്സരത്തിൽ ആഴ്സണലിനെതിരെ കളിക്കാൻ കഴിയുമെന്ന പ്രതീക്ഷയിലാണ് ഒനാന.
പരിക്ക് ഭേദമായി സ്ക്വാഡിനൊപ്പം പരിശീലനം നടത്തുന്നുണ്ടെങ്കിലും കളിക്കാനുള്ള പൂർണ്ണ അനുമതി ഒനാനക്ക് ലഭിച്ചിട്ടില്ല. കഴിഞ്ഞ സീസണിലെ മോശം പ്രകടനത്തിന് ശേഷം ശക്തമായ തിരിച്ചുവരവ് ലക്ഷ്യമിടുന്ന മാഞ്ചസ്റ്റർ യുണൈറ്റഡിന് ഒനാനയുടെ പ്രകടനം നിർണായകമാണ്. ഒനാനയുടെ അഭാവത്തിൽ ആൾട്ടേ ബയിന്ദിർ, ടോം ഹീറ്റൺ എന്നിവരാണ് ഗോൾകീപ്പർമാരായി കളിച്ചത്. ഓൾഡ് ട്രാഫോർഡിൽ നടക്കുന്ന ആഴ്സണൽ മത്സരത്തിന് ഒരാഴ്ച മാത്രം ശേഷിക്കെ, ആര് വല കാക്കും എന്ന് ഇപ്പോഴും ഉറപ്പില്ല.
