ലിവർപൂളിന്റെ അടുത്ത പരിശീലകനാകാൻ ആൻഡോണി ഇരയോള

ശനിയാഴ്ച ആർനെ സ്ലോട്ടിനെ ലിവർപൂൾ മുഖ്യ പരിശീലക സ്ഥാനത്ത് നിന്ന് പുറത്താക്കിയതിന് പിന്നാലെ, ക്ലബ്ബിന്റെ അടുത്ത കോച്ചാകാൻ ആൻഡോണി ഇരയോളയ്ക്ക് വലിയ സാധ്യതയെന്ന് റിപ്പോർട്ടുകൾ. ‘ദി അത്ലറ്റിക്’ മാധ്യമപ്രവർത്തകൻ ഡേവിഡ് ഓൺസ്റ്റീന്റെ പ്രത്യേക റിപ്പോർട്ട് പ്രകാരമാണ് 43-കാരനായ ഈ സ്പാനിഷ് പരിശീലകന്റെ പേര് മുൻനിരയിലേക്ക് വന്നിരിക്കുന്നത്. ലിവർപൂൾ സ്പോർട്ടിംഗ് ഡയറക്ടർ റിച്ചാർഡ് ഹ്യൂസുമായി ബോൺമൗത്തിൽ മുൻപ് ഒന്നിച്ച് പ്രവർത്തിച്ചിട്ടുള്ള പരിചയസമ്പന്നനാണ് ഇരയോള. ഇരയോളയുടെ കീഴിൽ തകർപ്പൻ അറ്റാക്കിങ് ഫുട്ബോൾ പുറത്തെടുത്ത ബോൺമൗത്ത് പ്രീമിയർ ലീഗിൽ ആറാം സ്ഥാനത്ത് ഫിനിഷ് ചെയ്യുകയും, ക്ലബ്ബിന്റെ ചരിത്രത്തിലാദ്യമായി യൂറോപ്പ ലീഗ് യോഗ്യത സ്വന്തമാക്കുകയും ചെയ്തിരുന്നു.

കഴിഞ്ഞ സീസണിന്റെ അവസാനത്തിൽ തുടർച്ചയായ 18 മത്സരങ്ങളിൽ അപരാജിത കുതിപ്പ് നടത്തിയാണ് ഇരയോളയുടെ ബോൺമൗത്ത് കളി അവസാനിപ്പിച്ചത്. അദ്ദേഹം ടീമിൽ നടപ്പിലാക്കിയ അഗ്രസീവ് പ്രസ്സിങ് ശൈലി (Aggressive pressing system) പ്രീമിയർ ലീഗിൽ വലിയ ശ്രദ്ധ നേടിയിരുന്നു. ലിവർപൂൾ മാനേജ്‌മെന്റ് നിലവിൽ സ്റ്റുട്ട്ഗാർട്ടിന്റെ സെബാസ്റ്റ്യൻ ഹോനസ്, ലെൻസിന്റെ പിയറി സേജ് എന്നിവരെയും പരിശീലക സ്ഥാനത്തേക്ക് പരിഗണിക്കുന്നുണ്ടെങ്കിലും, റിച്ചാർഡ് ഹ്യൂസുമായുള്ള അടുത്ത ബന്ധവും പ്രീമിയർ ലീഗിലെ മികച്ച ട്രാക്ക് റെക്കോർഡും ഇരയോളയ്ക്ക് മുൻഗണന നൽകുന്നു.
മുൻപ് ചെൽസിയും മാഞ്ചസ്റ്റർ യുണൈറ്റഡും ഇരയോളയെ ടീമിലെത്തിക്കാൻ താല്പര്യം കാണിച്ചിരുന്നുവെങ്കിലും, അവർ യഥാക്രമം സാബി അലോൺസോ, മൈക്കൽ കാരിക് എന്നിവരെ തങ്ങളുടെ പുതിയ പരിശീലകരായി നിയമിക്കുകയായിരുന്നു. ആർനെ സ്ലോട്ടിന്റെ അപ്രതീക്ഷിത പുറത്താകലിന് ശേഷം ആൽഫീൽഡിൽ ഒരു പുതിയ യുഗത്തിന് തുടക്കം കുറിക്കാൻ ഇരയോള എത്തുമോ എന്നാണ് ലിവർപൂൾ ആരാധകർ ഇപ്പോൾ കാത്തിരിക്കുന്നത്.