സൗദി അറേബ്യയിൽ അൽ നസർ അവരുടെ വിജയം പരമ്പര തുടരുകയാണ്. ഒരിക്കൽ കൂടി വിജയിച്ച് അവർ ഒന്നാം സ്ഥാനത്തേക്ക് അടുത്തു. ശക്തരായ അൽ അഹ്ലിയെ നേരിട്ട അൽ നസർ 4-3 എന്ന സ്കോറിനാണ് വിജയിച്ചത്. ഇരു ഭാഗത്തും സൂപ്പർ താരങ്ങൾ അണിനിരന്നപ്പോൾ കളി ആവേശകരമായി മാറി. റൊണാൾഡോ ഇരട്ട ഗോളുമായി അൽ നസറിന്റെ വിജയശില്പിയായി.
നാലാം മിനുട്ടിൽ ക്രിസ്റ്റ്യാനോ റൊണാൾഡോയുടെ ഗോളിലൂടെയാണ് അൽ നസർ ഗോളടി തുടങ്ങിയത്. മാനെയുടെ പാസിൽ നിന്നായിരുന്നു ഈ ഗോൾ. ആദ്യ പകുതിയിൽ 17ആം മിനുട്ടിലും 45ആം മിനുട്ടിലും ടലിസ്കയും അൽ നസറിനായി ഗോളടിച്ചു. മറുവശത്ത് അൽ അഹ്ലിക്കായി കെസ്സിയുടെ ഗോളും വന്നു. ആദ്യ പകുതി 3-1ന് അൽ നസർ മുന്നിട്ടു നിന്നു.
രണ്ടാം പകുതിയിൽ കളി മാറി. 50ആം മിനുട്ടിൽ മഹ്റസ് ഒരു പെനാൾട്ടിയിലൂടെ അൽ അഹ്ലിക്കായി ഗോൾ നേടി. സ്കോർ 3-2. പക്ഷെ അഹ്ലി ആശ്വസിക്കും മുമ്പ് 52ആം മിനുട്ടിൽ വീണ്ടും റൊണാൾഡോയുടെ ഗോൾ. സ്കോർ 4-2. 87ആം മിനുട്ടിൽ അൽ ബിക്രാൻ ഒരു ഗോൾ കൂടെ അൽ അഹ്ലിക്കായി നേടിയത് കളി 4-3 എന്നാക്കി. ഫുൾടൈം വിസിൽ വരെ പൊരുതി എങ്കിലും അൽ അഹ്ലിക്ക് പരാജയം ഒഴിവാക്കാൻ ആയില്ല.
7 മത്സരങ്ങൾ കഴിഞ്ഞപ്പോൾ അൽ നസറിന് 15 പോയിന്റാണ് ഉള്ളത്. ഒന്നാമതുള്ള അൽ ഇത്തിഹാദിനു 18 പോയിന്റാണ്.
