പോളിഷ് ഗോൾകീപ്പർ വോയ്‌ചെക്ക് ഷെസ്‌നിയുമായി 2027 ജൂൺ വരെ കരാർ നീട്ടാനുള്ള തങ്ങളുടെ പദ്ധതി ബാഴ്സലോണ ക്ലബ്ബ് സ്ഥിരീകരിച്ചു. ഔദ്യോഗിക നടപടികൾ പൂർത്തിയാക്കാനുണ്ടെങ്കിലും താരവുമായി ധാരണയിലെത്തിയതായി റിപ്പോർട്ടുകൾ സൂചിപ്പിക്കുന്നു.
അടുത്തയാഴ്ച സൈൻ ചെയ്യാൻ പോകുന്ന ജോവാൻ ഗാർസിയയെ ടീമിലെത്തിച്ചതിന് ശേഷവും ഷെസ്‌നിയുമായി മുന്നോട്ട് പോകാനാണ് ബാഴ്സലോണ ആഗ്രഹിക്കുന്നത്. ഇത് ടീമിന്റെ ഗോൾകീപ്പർ നിരയിൽ പരിചയസമ്പന്നനായ ഒരു കളിക്കാരന്റെ പ്രാധാന്യം ക്ലബ്ബ് എത്രത്തോളം കാണുന്നു എന്നതിന്റെ സൂചനയാണ്.
ഷെസ്‌നി കഴിഞ്ഞ സീസണിൽ ബാഴ്സയുടെ രക്ഷകനായിരുന്നു. ഒരൊറ്റ സീസണായി എത്തിയ താരം ആരാധകരുടെയും മാനേജർ ഫ്ലിക്കിന്റെയും വിശ്വസ്തനായി മാറി. ഗാർസിയ നിലയുറപ്പിക്കും വരെ ഷെസ്നിയെ ടീമിൽ നിർത്താൻ ആണ് ഫ്ലിക്ക് ആഗ്രഹിക്കുന്നത്.
