ചാമ്പ്യൻസ് ലീഗ് സെമി ഫൈനലിലെ മിലാൻ ഡർബിയുടെ ആദ്യ പാദം ഇന്റർ മിലാൻ സ്വന്തമാക്കി. ഇന്ന് സാൻസിരോയിൽ തുടക്കത്തി തന്നെ നേടിയ രണ്ടു ഗോളുകളുടെ ബലത്തിൽ 2-0ന്റെ വിജയം സ്വന്തമാക്കാൻ ഇന്റർ മിലാനായി. എ സി മിലാന്റെ ആരാധകർ നിറഞ്ഞു നിന്ന സ്റ്റേഡിയത്തിൽ ആയിരുന്നു ഈ ഫലം. ഇതേ സ്റ്റേഡിയത്തിൽ അടുത്ത ആഴ്ച ഇന്റർ മിലാൻ ആരാധകർക്ക് മുന്നിൽ രണ്ടാം പാദ സെമി നടക്കും.
ഇന്ന് കളി ആരംഭിച്ച് എട്ടാം മിനുട്ടിൽ തന്നെ ഇന്റർ മിലാൻ ലീഡ് എടുത്തു. എഡിൻ ജെക്കോയുടെ ഒരു നല്ല ഫിനിഷ് ആണ് ഇന്ററിന് ലീഡ് നൽകിയത്. ഈ ഗോൾ വീണ ഞെട്ടൽ മാറും മുമ്പ് എ സി മിലാൻ രണ്ടാം ഗോളും വഴങ്ങി. ഇത്തവണ മിഖിതാര്യന്റെ ഫിനിഷ് ആയിരുന്നു. മത്സരം 11 മിനുട്ട് കഴിയുമ്പോൾ സ്കോർ 2-0.
മൂന്നാം ഗോൾ നേടാൻ പല നല്ല അവസരങ്ങളും ഇന്റർ മിലാൻ ആദ്യ പകുതിയിൽ സൃഷ്ടിച്ചു. പക്ഷെ ഫലം ഉണ്ടായില്ല. ഗോൾ പോസ്റ്റും വാറും എല്ലാം ഇന്ററിനെ തടയാൻ എത്തി. രണ്ടാം പകുതിയിൽ മിലാൻ തിരിച്ചടിക്കാൻ ശ്രമിച്ചു എങ്കിലും ഫലം ഉണ്ടായില്ല.
