രാജ്യത്തെ തന്നെ ഏറ്റവും മികച്ച സ്പോർട്സ് ഹബിൽ ഒന്നായ ട്രാൻസ്റ്റേഡിയയെ താൽക്കാലിക ഹോം ഗ്രൌണ്ടാക്കാൻ ഒരുങ്ങി ചെന്നൈയിൻ എഫ് സിയും മിനേർവ പഞ്ചാബും. അഹമ്മദാബാദിൽ കഴിഞ്ഞ് വർഷം ഉദ്ഘാടനം ചെയ്ത ട്രാൻസ്റ്റേഡിയയിൽ എ എഫ് സി കപ്പ് മത്സരങ്ങൾ കളിക്കാനാണ് ഇരു ക്ലബുകളും ആലോചിക്കുന്നത്. ഐ ലീഗ് ചാമ്പ്യന്മാരായ മിനേർവ പഞ്ചാബും ഐ എസ് എൽ ചാമ്പ്യന്മാരായ ചെന്നൈയിനും ഇത്തവണ ഏഷ്യയിൽ ഇന്ത്യയെ പ്രതിനിധീകരിക്കുന്നുണ്ട്‌.
എല്ലാ കായിക ഇനങ്ങളും നടത്താൻ സൗകര്യമുള്ള ഹബ്ബാണ് ട്രാൻസ്റ്റേഡിയ. ഈ കഴിഞ്ഞ മാസം കേരള ബ്ലാസ്റ്റേഴ്സ് പരിശീലനം നടത്തിയതും ട്രാൻസ്റ്റേഡിയയിൽ ആയിരുന്നു. ട്രാൻസ്സ്റ്റേഡിയയുടെ പ്രധാന ആകർഷണമായ ഗംഭീര ഫുട്ബോൾ പിച്ചിൽ ആകും മത്സരങ്ങൾ നടക്കുക. 20000ത്തോളം പേർക്ക് ഇരിക്കാവുന്ന ഗ്യാലറിയുള്ള ഫുട്ബോൾ സ്റ്റേഡിയമാണ് ട്രാൻസ്റ്റേഡിയയിൽ ഉള്ളത്.
മിനേർവ പഞ്ചാബിന് എ എഫ് സി ചാമ്പ്യൻസ് ലീഗ് പ്ലേ ഓഫ് കളിക്കാനുണ്ട്. അതിൽ പരാജയപ്പെട്ടാൽ മാത്രമെ മിനേർവ എ എഫ് സി കപ്പിൽ എത്തുകയുള്ളൂ. അല്ലായെങ്കിൽ ചാമ്പ്യൻസ് ലീഗിലാകും മിനേർവ ട്രാൻസ്റ്റേഡിയയിൽ കളിക്കുക.
കൂടുതൽ കായിക വാർത്തകൾക്ക് : www.facebook.com/FanportOfficial
