തുടര്‍ച്ചയായ 12ാം തവണയും തായ്‍വാന്റെ തായി സു യിംഗിനോട് കീഴടങ്ങി സൈന നെഹ്‍വാല്‍. കഴിഞ്ഞാഴ്ച ഡെന്മാര്‍ക്ക് ഓപ്പണ്‍ ഫൈനലിന്റെ ആവര്‍ത്തനമായ ഫ്രഞ്ച് ഓപ്പണ്‍ ക്വാര്‍ട്ടര്‍ ഫൈനലില്‍ നേരിട്ടുള്ള ഗെയിമുകളിലായിരുന്നു സൈനയുടെ തോല്‍വി. ആദ്യ ഗെയിമില്‍ 20-16നു ലീഡ് ചെയ്യുമ്പോള്‍ നാല് ഗെയിം പോയിന്റുകള്‍ നഷ്ടമാക്കിയതാണ് മത്സരത്തില്‍ സൈനയ്ക്ക് തിരിച്ചടിയായത്.
തിരിച്ചുവരവ് നടത്തിയ തായി 22-20നു ആദ്യ ഗെയിം സ്വന്തമാക്കി. രണ്ടാം ഗെയിമില്‍ മാനസികമായ മുന്‍തൂക്കവും താരം സ്വന്തമാക്കിയതോടെ സൈനയെ നിഷ്പ്രഭമാക്കി ലോക ഒന്നാം നമ്പര്‍ താരം 36 മിനുട്ടില്‍ മത്സരം അവസാനിപ്പിച്ചു. സ്കോര്‍: 22-20, 21-11
