ഗ്വാങ്ജു (ദക്ഷിണ കൊറിയ): 18 വയസ്സുകാരിയായ ഇന്ത്യൻ അമ്പെയ്ത്ത് താരം ശീതൾ ദേവി കായിക ചരിത്രത്തിൽ പുതിയൊരധ്യായം എഴുതിച്ചേർത്തു. ഗ്വാങ്ജുവിലെ (ദക്ഷിണ കൊറിയ) 2025-ലെ പാരാ വേൾഡ് ആർച്ചറി ചാമ്പ്യൻഷിപ്പിൽ വനിതകളുടെ കോമ്പൗണ്ട് വ്യക്തിഗത ഇനത്തിൽ ഷീതൾ സ്വർണ്ണ മെഡൽ നേടി.
ആകാംഷ നിറഞ്ഞ ഫൈനലിൽ ലോക ഒന്നാം നമ്പർ താരമായ തുർക്കിയുടെ ഓസ്‌നൂർ കുറേ ഗിർദിയെ 146-143 എന്ന സ്കോറിനാണ് ഷീതൾ പരാജയപ്പെടുത്തിയത്. മത്സരത്തിലുടനീളം തകർപ്പൻ പ്രകടനമാണ് ഷീതൾ കാഴ്ചവെച്ചത്. അഞ്ചാമത്തെയും അവസാനത്തെയും “എൻഡിൽ” മൂന്ന് മികച്ച അമ്പുകൾ തൊടുത്ത് ഷീതൾ തന്റെ വിജയം ഉറപ്പിച്ചു.
ഈ വിജയം ഷീതളിന് വ്യക്തിപരമായി മാത്രമല്ല, ലോകമെമ്പാടുമുള്ള കായിക താരങ്ങൾക്ക് വലിയ പ്രചോദനവുമാണ്. ഈ ടൂർണമെന്റിൽ കൈകളില്ലാത്ത ഏക മത്സരാർത്ഥിയായ ഷീതൾ, തന്റെ പാദങ്ങളും താടിയെല്ലും ഉപയോഗിച്ചാണ് അമ്പെയ്യുന്നത്. കായികരംഗത്തെ പരിമിതികളെയും മുൻധാരണകളെയും ഇത് ചോദ്യം ചെയ്യുന്നു.
ടോമൻ കുമാറിനൊപ്പമുള്ള മിക്സഡ് ടീം ഇനത്തിൽ വെങ്കലവും, സരിതാ ദേവിക്കൊപ്പമുള്ള ടീം ഇനത്തിൽ വെള്ളിയും നേടിയ ഷീതളിന്റെ ഈ സ്വർണമെഡൽ ഈ ചാമ്പ്യൻഷിപ്പിലെ താരത്തിന്റെ മൂന്നാമത്തെ മെഡലാണ്. ഈ നേട്ടം ഇന്ത്യക്ക് അഭിമാനകരവും ലോകമെമ്പാടുമുള്ള പാരാ കായികതാരങ്ങൾക്ക് ഒരു മാതൃകയുമാണ്.
