മലപ്പുറം: കേരളാ ബ്ലാസ്റ്റേഴ്സിന്റെ യുവ മുന്നേറ്റതാരം റിഷാദ് ഗഫൂറിനെ ലോണടിസ്ഥാനത്തിൽ ടീമിലെത്തിച്ച് മലപ്പുറം ഫുട്ബോൾ ക്ലബ്. വെറും 18 വയസ്റ്റ് പ്രായം മാത്രമാണ് താരത്തിനുള്ളത്. ടീമിലെ തന്നെ ഏറ്റവും പ്രായം കുറഞ്ഞ കളിക്കാരൻ കൂടിയാണ് ഈ മലപ്പുറം പൊന്നാനി സ്വദേശി. കഴിഞ്ഞ വർഷം സൂപ്പർ ലീഗ് കേരളയിൽ കണ്ണൂർ വാറിയേർസിന് വേണ്ടി ശ്രദ്ധേയമായ പ്രകടനം താരം നടത്തിയിരുന്നു. കണ്ണൂരിന് വേണ്ടി 8 കളികളിൽ നിന്നും 1 ഗോളും 2അസിസ്റ്റും നേടിയിട്ടുണ്ട്.
തിരൂരിലെ മൗലാന കൂട്ടായി ഫുട്ബോൾ അക്കാദമിയിലൂടെയാണ് താരം വളർന്നു വന്നത്. പിന്നീട് അവിടന്ന് മുത്തൂറ്റ് എഫ്എ റിഷാദിനെ പൊക്കുകയായിരുന്നു. മുത്തൂറ്റിന് വേണ്ടി 2023-24 സീസൺ ഡെവലപ്പമെൻറ് ലീഗിൽ 6 മത്സരങ്ങളിൽ നിന്നും 5 ഗോളുകൾ നേടി മിന്നും പ്രകടനം കാഴച വെച്ചിരുന്നു. യുകെയിൽ വെച്ച് നടന്ന നെക്സ്റ്റ് ജെൻ കപ്പിന് അന്ന് ടീം യോഗ്യതയും നേടി.
പിന്നീട് കേരള ബ്ലാസ്റ്റേഴ്സിലേക്ക് ചേക്കേറിയ താരം 2024-25 സീസണിലെ ഡെവലപ്മെൻറ് ലീഗിലും കേരളാ പ്രീമിയർ ലീഗിലും മഞ്ഞ കുപ്പായമണിഞിട്ടുണ്ട്. കൂടാതെ കഴിഞ്ഞ വർഷം സന്തോഷ് ട്രോഫി റണ്ണർഅപ്പായ കേരളാ ടീമിലെ അംഗം കൂടിയായിരുന്നു ഈ കൗമാരക്കാരൻ. സൂപ്പർ ലീഗിൽ ഇത്തവണ മലപ്പുറത്തിന്റെ മുന്നേറ്റ നിരയിൽ മികച്ച പ്രകടനം കാഴ്ചവെക്കാൻ ഒരുങ്ങുകയാണ് റിഷാദ്.
