ലാലിഗയിൽ ഒസാസുനയ്‌ക്കെതിരെ റയൽ മാഡ്രിഡ് 4-0 ന് നിർണായക വിജയം നേടി ഫോമിലേക്ക് തിരികെയെത്തി. വിനീഷ്യസ് ജൂനിയർ ഹാട്രിക്കുമായി മനം കവർന്നു. ഒസാസുനയുടെ പ്രതിരോധത്തെ നിരന്തര സമ്മർദ്ദത്തിലാക്കിയ റയൽ 34-ാം മിനിറ്റിൽ ഗോൾ നേടി. ജൂഡ് ബെല്ലിംഗ്ഹാമിൻ്റെ അസിസ്റ്റിൽ നിന്ന് വിനീഷ്യസ് ജൂനിയർ ആണ് ഗോളടി തുടങ്ങിയത്.
42-ാം മിനിറ്റിൽ ബെല്ലിംഗ്ഹാമിൻ്റെ ഉജ്ജ്വലമായ സോളോ ഗോളിലൂടെ റയൽ ലീഡ് ഇരട്ടിയാക്കി. ഒസാസുനയ്‌ക്കെതിരായ രണ്ട് മത്സരങ്ങളിലെ അദ്ദേഹത്തിൻ്റെ മൂന്നാമത്തെ ഗോളായിരുന്നു ഇത്. റയൽ മാഡ്രിഡ് ആദ്യ പകുതിയിൽ 2-0ന് മുന്നിലെത്തി.
രണ്ടാം പകുതിയിൽ വിനീഷ്യസ് തൻ്റെ ക്ലിനിക്കൽ ഫോം തുടരുന്നത് കണ്ടു, രണ്ട് ഗോളുകൾ കൂടി താരം ചേർത്തു. 61-ാം മിനിറ്റിലും 69-ാം മിനിറ്റിലും വിനീഷ്യസ് ഗോൾ വല കണ്ടെത്തി. 2022 മെയ് മാസത്തിന് ശേഷമുള്ള വിനീഷ്യസിൻ്റെ ആദ്യ ഹാട്രിക്കായിരുന്നു ഇത്.
റയലിന് ഈ വിജയം തുടർച്ചയായ രണ്ട് പരാജയങ്ങൾക്ക് ശേഷമാണ് വരുന്നത്. റയൽ മാഡ്രിഡ് 27 പോയിന്റുമായി രണ്ടാം സ്ഥാനത്ത് നിൽക്കുന്നു.
