ഇന്നലെ കൊച്ചിയിലെ ജവഹർലാൽ നെഹ്റു സ്റ്റേഡിയത്തിൽ നടന്നത് ജാലവിദ്യയിൽ കുറഞ്ഞ ഒന്നുമല്ലായിരുന്നു. പറയുമ്പോൾ എല്ലാം പറയണമല്ലോ, കഴിഞ്ഞ കൊല്ലത്തെ ഐഎസ്എല്ലിൽ എവിടെ നിറുത്തിയോ, അവിടെ നിന്നു തന്നെ ഇവാൻ ആശാനും പുതിയ സീസണ് തുടങ്ങിയ കാഴ്ചയാണ് കണ്ടത്.
ബ്ലാസ്റ്റേഴ്സ് ആരാധകരെ കൊണ്ടു തിങ്ങി നിറഞ്ഞ സ്റ്റേഡിയം തങ്ങളുടെ ടീമിന് ആവേശോജ്വലമായ വരവേൽപ്പാണ് നൽകിയത്. ഭീമൻ ബാനറുകളും, മെക്സിക്കൻ തിരകളും, ചെണ്ടമേളവും കൊണ്ടു ഗാലറികൾ ആവേശ കൊടുമുടി കയറി. ഇതിനെ സാധൂകരിച്ചു കൊണ്ടുള്ള കളിയാണ് ഈസ്റ്റ് ബംഗാളിനെതിരെ കേരള ബ്ലാസ്റ്റേഴ്സ് ടീം ആദ്യം മുതൽ തന്നെ പുറത്തെടുത്തത്. ഒന്നിന് പിറകെ ഒന്നായി എതിരാളികളുടെ ഗോൾ പോസ്റ്റിലേക്ക് ലുലയും കൂട്ടരും ഇരച്ചു കയറിയപ്പോൾ, ആഘോഷം ഗാലറികളിലേക്കും പടർന്നു.
ഗോൾ രഹിതമായ ഒന്നാം പാദത്തിന് ശേഷം രണ്ടാമത്തെ പകുതിയിൽ കളി തുടങ്ങിയപ്പോൾ ഒരു കാര്യം മനസ്സിലായി, ഈസ്റ്റ് ബംഗാൾ തളർന്നു കഴിഞ്ഞിരുന്നു. ഉശിരൻ ഫുട്ബാൾ പുറത്തെടുത്ത ബ്ലാസ്റ്റേഴ്സ് ടീം മാത്രമായിരുന്നില്ല അതിന് കാരണം, ഒരു നിമിഷം പോലും നിറുത്താതെയുള്ള ഗാലറിയിലെ മഞ്ഞപ്പടയുടെ ആർപ്പുവിളികളും ബംഗാൾ ടീമിന്റെ മനോവീര്യം തകർത്തിരുന്നു. അതിന്റെ പ്രതിഫലനമാണ് ഫൈനൽ സ്കോറിലും കണ്ടത്.
പക്ഷെ ഒരു കാര്യം കൊണ്ടു ഒരു കൂട്ടം ബ്ലാസ്റ്റേഴ്സ് ആരാധകർ ആളുകളുടെ മനം മടുപ്പിച്ചു. സംഘാടകർ നിരോധിച്ചിരുന്ന പീപ്പി കുറെയേറെ കാണികൾ സ്റ്റേഡിയത്തിന് അകത്തേക്ക് ഒളിപ്പിച്ചു കടത്തിയിരുന്നു. കളിയുടെ തുടക്കം മുതൽ അവസാനം വരെ നിറുത്താതെയുള്ള ഇവരുടെ പീപ്പിയൂതൽ യഥാർത്ഥ ആരാധകർക്ക് അരോചകമായി മാറി. എന്തിന് അധികം പറയുന്നു, ആർപ്പ് വിളികളെ പോലും പലപ്പോഴും കടത്തി വെട്ടിയ ഈ പീപ്പി ശബ്ദം, ടിവിയിൽ കളി കണ്ടിരുന്നവർക്കും ബുദ്ധിമുട്ടായി മാറി. ഇന്നലത്തെ കളിയിൽ ആകെയുണ്ടായ ഒരു കറുത്ത പാട്, അല്ലെങ്കിൽ അപശബ്ദം ചിലരുടെ നിരുത്തരവാദപരമായ ഈ പ്രകടനം മാത്രമായി.
സംഘാടകർക്കും കളിക്കാർക്കും എന്നപോലെ കാണികൾക്കും ചില ചുമതലകൾ ഉണ്ടെന്ന് തിരിച്ചറിയണം. ഇന്ത്യയിൽ തന്നെ എല്ലാവരും അത്ഭുതപ്പെടുന്ന തരത്തിലുള്ള മഞ്ഞപ്പട ആരാധകർ ഇത് മനസ്സിലാക്കി, ഇതിനെതിരെ ബോധവൽക്കരണം നടത്തണം. ഇനിയും ഇത് ആവർത്തിച്ചു ചീത്തപ്പേര് ഉണ്ടാക്കാതെ നോക്കണം, പാപികളുടെ പീപ്പിയെ പടിക്ക് പുറത്താക്കണം.
