യുഎസ് ഓപ്പൺ ടെന്നീസിന്റെ ക്വാർട്ടർ ഫൈനലിൽ ശക്തമായ പോരാട്ടത്തിൽ ഡൊമിനിക് തിമിനെ പരാജയപ്പെടുത്തി ഒന്നാം നമ്പർ താരം റാഫേൽ നദാൽ സെമിയിൽ പ്രവേശിച്ചു. ആദ്യ സെറ്റ് 0-6 എന്ന സ്കോറിന് നഷ്ടപ്പെട്ട ശേഷമായിരുന്നു നദാലിന്റെ ശക്തമായ തിരിച്ചുവരവ്. രണ്ടും മൂന്നും സെറ്റുകൾ നേടിയ സ്പാനിഷ് താരത്തിന് നാലാം സെറ്റിൽ പിഴച്ചു. പലപ്പോഴും സെറ്റുകളുടെ തുടക്കത്തിൽ തന്നെ ലീഡ് വഴങ്ങിയ ശേഷമാണ് കോർട്ടിലെ പോരാളിയായ നദാൽ ജയിച്ചു കയറിയത്. അവസാന സെറ്റിൽ ടൈ ബ്രേക്കർ നിലവിലുള്ള ഗ്രാൻഡ്സ്ലാം ആയത് മത്സരത്തിന്റെ ദൈർഘ്യം കുറച്ചു എന്നുവേണം പറയാൻ. എങ്കിലും മത്സരം നാലു മണിക്കൂറിലധികം നീണ്ടു നിന്നു.
മറ്റൊരു ക്വാർട്ടർ പോരാട്ടത്തിൽ അമേരിക്കയുടെ ഇസ്‌നറെ പരാജയപ്പെടുത്തി ഡെൽപോട്രോ സെമിയിൽ കടന്നു. ആദ്യ സെറ്റ് വഴങ്ങിയ ശേഷമായിരുന്നു ഡെൽപോട്രോയുടെ വിജയം. സെമിയിൽ ഡെൽപോട്രോ നദാലിനെ നേരിടും. വനിതാ വിഭാഗത്തിൽ ഗ്രാൻഡ്സ്ലാം റെക്കോർഡിനുടമയായ സെറീന വില്ല്യംസ് പ്ലിസ്‌കോവയെ നേരിട്ടുള്ള സെറ്റുകൾക്ക് മറികടന്ന് സെമിയിൽ പ്രവേശിച്ചു. ഡബിൾസിൽ ഇന്ത്യൻ പ്രതീക്ഷയായ ബൊപ്പണ്ണ സഖ്യം പുറത്തായി.
