അഹമ്മദാബാദ്: വിജയ് ഹസാരെ ട്രോഫിയിൽ കേരളത്തിന്റെ വിധി നിശ്ചയിക്കുന്ന നിർണ്ണായക പോരാട്ടം ഇന്ന്. ഗ്രൂപ്പ് ഘട്ടത്തിലെ അവസാന മത്സരത്തിൽ അയൽക്കാരായ തമിഴ്നാടിനെയാണ് കേരളം നേരിടുന്നത്. ഇന്ന് വിജയിച്ചാൽ രോഹൻ കുന്നുമ്മലിനും സംഘത്തിനും ആധികാരികമായി ക്വാർട്ടർ ഫൈനലിലേക്ക് മുന്നേറാം.
നിലവിൽ എലീറ്റ് ഗ്രൂപ്പ് എ-യിൽ ആറ് മത്സരങ്ങളിൽ നാല് ജയവുമായി 16 പോയിന്റോടെ രണ്ടാം സ്ഥാനത്താണ് കേരളം. കർണാടക 24 പോയിന്റുമായി ഇതിനോടകം ക്വാർട്ടർ ഉറപ്പിച്ചു കഴിഞ്ഞു. രണ്ടാം സ്ഥാനത്തിനായി കേരളത്തോടൊപ്പം 16 പോയിന്റുള്ള ജാർഖണ്ഡും മധ്യപ്രദേശും രംഗത്തുണ്ട്.
എന്നാൽ റൺറേറ്റിൽ കേരളത്തിന് വ്യക്തമായ ആധിപത്യമുണ്ട് (+0.933). നിലവിലെ കണക്കനുസരിച്ച് ജാർഖണ്ഡിനേക്കാൾ 85 റൺസിനും /13 ഓവറുകൾക്കും, മധ്യപ്രദേശിനേക്കാൾ 140 റൺസിനും 25 ഓവറുകൾക്കും മുന്നിലാണ് കേരളം. ഇതിനർത്ഥം, പോയിന്റ് നിലയിൽ തുല്യത വന്നാലും കേരളത്തെ മറികടക്കാൻ ജാർഖണ്ഡിനോ മധ്യപ്രദേശിനോ ഇന്നത്തെ മത്സരങ്ങളിൽ വലിയ മാർജിനിൽ വിജയിക്കേണ്ടി വരും.
ഈ സീസണിൽ നായകൻ രോഹൻ കുന്നുമ്മലിന് കീഴിൽ കേരളം മികച്ച ഫോമിലാണ് കളിക്കുന്നത്. കഴിഞ്ഞ മത്സരത്തിൽ പുതുച്ചേരിയെ വെറും 29 ഓവറിൽ തകർത്തുവിട്ടതും ടീമിന്റെ വീര്യം കൂട്ടിയിട്ടുണ്ട്. മറുവശത്ത് തമിഴ്നാട് അല്പം പതറുന്നുണ്ടെങ്കിലും അവരെ നിസ്സാരക്കാരായി കാണാൻ കഴിയില്ല. വരുൺ ചക്രവർത്തി, സായ് കിഷോർ എന്നിവരടങ്ങുന്ന സ്പിൻ നിര ഏത് ബാറ്റിംഗ് നിരയെയും തകർക്കാൻ ശേഷിയുള്ളവരാണ്.
കേരളം ഇന്ന് തമിഴ്നാടിനെ തോൽപ്പിച്ചാൽ പോയിന്റ് 20 ആയി ഉയരും. ജാർഖണ്ഡും മധ്യപ്രദേശും അവരുടെ മത്സരങ്ങൾ ജയിച്ചാലും റൺറേറ്റിൽ കേരളം വളരെ മുന്നിലായതിനാൽ, കേരളത്തിന് രണ്ടാം സ്ഥാനക്കാരായി ക്വാർട്ടറിലെത്താം.
പക്ഷെ കേരളം ഇന്ന് പരാജയപ്പെടുകയാണെങ്കിൽ കാര്യങ്ങൾ സങ്കീർണ്ണമാകും. അങ്ങനെയുണ്ടായാൽ ജാർഖണ്ഡും മധ്യപ്രദേശും തങ്ങളുടെ മത്സരങ്ങളിൽ പരാജയപ്പെട്ടാൽ മാത്രമേ കേരളത്തിന് പ്രതീക്ഷയ്ക്ക് വകയുള്ളൂ. ഈ മൂന്ന് ടീമുകളും പരാജയപ്പെട്ടാലും 16 പോയിന്റിൽ റൺറേറ്റ് അടിസ്ഥാനത്തിൽ കേരളം തന്നെയാകും മുന്നിലെത്തുക.
എന്നാൽ ഇതിൽ ഏതെങ്കിലും ഒരു ടീം ജയിക്കുകയും, കേരളം തോൽക്കുകയും ചെയ്താൽ കേരളം പുറത്താകും. ചുരുക്കത്തിൽ, ഇന്ന് തമിഴ്നാടിനെതിരെ നേടുന്ന വിജയം കേരളത്തിന് ഒരു ‘സേഫ്റ്റി നെറ്റ്’ ഒരുക്കും. റൺറേറ്റിലെ ഈ വലിയ വ്യത്യാസം മറികടക്കാൻ എതിരാളികൾക്ക് അവിശ്വസനീയമായ ജയങ്ങൾ ആവശ്യമാണ് എന്നതും കേരളത്തിന്റെ ആത്മവിശ്വാസം വർദ്ധിപ്പിക്കുന്നു.
ഗ്രൂപ്പ് എ-യിലെ രണ്ടാം സ്ഥാനക്കാർക്ക് ക്വാർട്ടർ ഫൈനലിൽ മുംബൈ അല്ലെങ്കിൽ പഞ്ചാബ് ടീമുകളിലൊന്നിനെയാകും നേരിടേണ്ടി വരിക.
