ഇന്ത്യയും പാകിസ്ഥാനും തമ്മിൽ ശനിയാഴ്ച വൈകുന്നേരം നിലവിൽ വന്ന വെടിനിർത്തൽ കരാറിനെ തുടർന്ന് ഐപിഎൽ 2025 സീസൺ മെയ് 15 ന് തന്നെ പുനരാരംഭിക്കാൻ ബിസിസിഐ ശ്രമം തുടങ്ങിയതായി ഇഎസ്പിഎൻ റിപ്പോർട്ട് ചെയ്യുന്നു.
അതിർത്തിയിലെ സംഘർഷം വർധിച്ചതിനെ തുടർന്ന് മെയ് 9 ന് ടൂർണമെന്റ് ഒരാഴ്ചത്തേക്ക് നിർത്തിവച്ചിരുന്നു. ഇതിന്റെ ഫലമായി ധർമ്മശാലയിൽ പഞ്ചാബ് കിംഗ്‌സും ഡൽഹി ക്യാപിറ്റൽസും തമ്മിലുള്ള മത്സരം ആദ്യ ഇന്നിംഗ്‌സിൽ ഉപേക്ഷിക്കേണ്ടിവന്നു. ഇതുവരെ 57 മത്സരങ്ങൾ പൂർത്തിയായിട്ടുണ്ട്. 12 ലീഗ് മത്സരങ്ങളും 4 പ്ലേ ഓഫുകളും ഇനി നടക്കാനുണ്ട്.
സർക്കാർ അനുമതി ലഭിച്ചാൽ പുതുക്കിയ ഷെഡ്യൂൾ ഞായറാഴ്ച (മെയ് 11) ഭരണസമിതി യോഗം ചേർന്ന് അന്തിമമാക്കുമെന്ന് ബിസിസിഐ വൈസ് പ്രസിഡന്റ് രാജീവ് ശുക്ല പറഞ്ഞു.
അതേസമയം, വെള്ളിയാഴ്ചയും ശനിയാഴ്ചയുമായി ഇന്ത്യയിൽ നിന്ന് മടങ്ങിയ വിദേശ കളിക്കാരെ തിരികെ വിളിക്കാനുള്ള ശ്രമത്തിലാണ് ഫ്രാഞ്ചൈസികൾ. ഗുജറാത്ത് ടൈറ്റൻസ് പോലുള്ള ടീമുകളിൽ നിന്ന് ജോസ് ബട്‌ലറും ജെറാൾഡ് കോട്‌സിയും മാത്രമാണ് പോയത്. അവരെ തിരികെ കൊണ്ടുവരാനുള്ള ശ്രമങ്ങൾ അവർ സജീവമാക്കിയിട്ടുണ്ട്.
