സൺറൈസേഴ്സ് ഹൈദരാബാദിനെതിരായ മത്സരത്തിനിടെ പരിക്കേറ്റതിനെ തുടർന്ന് പഞ്ചാബ് കിംഗ്സ് പേസർ ലോക്കി ഫെർഗൂസണ് ഐപിഎൽ 2025 സീസൺ മുഴുവനായും നഷ്ടമാകും. ഫെർഗൂസൺ ഈ സീസണിൽ തിരിച്ചെത്താൻ സാധ്യതയില്ലെന്ന് പിബികെഎസ് ബൗളിംഗ് കോച്ച് ജെയിംസ് ഹോപ്സ് സ്ഥിരീകരിച്ചു.
നാല് മത്സരങ്ങളിൽ നിന്ന് അഞ്ച് വിക്കറ്റുകൾ നേടിയ ന്യൂസിലൻഡ് താരം എസ്ആർഎച്ചിനെതിരെ രണ്ട് പന്തുകൾ എറിഞ്ഞതിന് ശേഷം മൈതാനത്ത് നിന്ന് പുറത്തേക്ക് പോകുകയായിരുന്നു. നേരത്തെ ഐഎൽടി20യിലേറ്റ ഹാംസ്ട്രിംഗ് പരിക്ക് കാരണം ചാമ്പ്യൻസ് ട്രോഫി അദ്ദേഹത്തിന് നഷ്ടമായിരുന്നു.
“അദ്ദേഹം തിരിച്ചെത്തുമെന്ന് ഞങ്ങൾ പ്രതീക്ഷിക്കുന്നില്ല,” ഹോപ്സ് മത്സരത്തിന് മുന്നോടിയായുള്ള വാർത്താ സമ്മേളനത്തിൽ പറഞ്ഞു. “ലോക്കിക്ക് കാര്യമായ പരിക്കുണ്ട്.”
അദ്ദേഹത്തിന് പകരം വെക്കാൻ പറ്റിയ ഒരു താരം ലഭ്യമല്ലാത്തതിനാൽ, സീസൺ ഓപ്പണറിൽ മികച്ച പ്രകടനം കാഴ്ചവെച്ച അസ്മത്തുള്ള ഒമർസായിയെയോ വൈശാഖ് വിജയകുമാറിനെയോ പിബികെഎസ് അടുത്ത മത്സരത്തിൽ പരിഗണിച്ചേക്കാം.
