ദക്ഷിണാഫ്രിക്കന്‍ മണ്ണില്‍ വീണ്ടും കരുത്ത് കാട്ടി ഇന്ത്യന്‍ സ്പിന്നര്‍മാര്‍. ഇന്ന് നടന്ന രണ്ടാം ഏകദിന മത്സരത്തില്‍ ആദ്യം ബാറ്റ് ചെയ്ത ദക്ഷിണാഫ്രിക്ക 118 റണ്‍സിനു ഓള്‍ഔട്ട് ആവുകയായിരുന്നു. 32.2 ഓവര്‍ മാത്രമാണ് ഇന്ത്യന്‍ സ്പിന്നര്‍മാര്‍ക്ക് മുന്നില്‍ ആതിഥേയര്‍ക്ക് പിടിച്ച് നില്‍ക്കാനായത്. ഖായ സോണ്ഡോ, ജീന്‍ പോള്‍ ഡുമിനി എന്നിവര്‍ ആണ് ടീമിലെ ടോപ് സ്കോറര്‍. ഇരുവരും 25 റണ്‍സാണ് നേടിയത്. ഹാഷിം അംല(23), ക്വിന്റണ്‍ ഡിക്കോക്ക്(20) എന്നിവരും തുടക്കത്തില്‍ ക്രീസില്‍ പിടിച്ചു നിന്നുവെങ്കിലും പിന്നീട് ചെറുത്ത് നില്പ് അവസാനിപ്പിച്ച് പവലിയനിലേക്ക് ഇരുവര്‍ക്കും മടങ്ങേണ്ടി വന്നു.
യൂസുവേന്ദ്ര ചഹാല്‍ തന്റെ 8.2 ഓവറില്‍ 22 റണ്‍സ് വഴങ്ങി 5 വിക്കറ്റ് വീഴ്ത്തിയപ്പോള്‍ കുല്‍ദീപ് യാദവ് മൂന്ന് വിക്കറ്റുമായി ചഹാലിനു മികച്ച പിന്തുണ നല്‍കി. ഭുവനേശ്വര്‍ കുമാറും ജസ്പ്രീത് ബുംറയും ഓരോ വിക്കറ്റ് വീഴ്ത്തി. ആറ് മത്സരങ്ങളുടെ പരമ്പരയിലെ ആദ്യ മത്സരം ഡര്‍ബനില്‍ ഇന്ത്യ ജയിച്ചിരുന്നു.
കൂടുതൽ കായിക വാർത്തകൾക്ക് : www.facebook.com/FanportOfficial
