മുൻ ഇന്ത്യൻ ക്യാപ്റ്റൻ മഹേന്ദ്ര സിംഗ് ധോണി ഇപ്പോഴും ഇന്ത്യക്ക് വേണ്ടി കളിക്കാൻ യോഗ്യനാണെന്ന് മുൻ ഓസ്‌ട്രേലിയൻ താരവും ചെന്നൈ സൂപ്പർ കിങ്‌സ് താരവുമായിരുന്ന മൈക്കിൾ ഹസി. എന്നാൽ ധോണിയുടെ ഭാവിയെ കുറിച്ചുള്ള കാര്യങ്ങൾ തീരുമാനിക്കേണ്ടത് മഹേന്ദ്ര സിംഗ് ധോണിയാണെന്നും ഹസി പറഞ്ഞു. ചെന്നൈ സൂപ്പർ കിങ്സിന്റെ ഇൻസ്റ്റാഗ്രാം പേജിൽ സംസാരിക്കുകയിരുന്നു ഹസി.
കൂടാതെ മഹേന്ദ്ര സിംഗ് ധോണിക്കൊപ്പവും മുരളി വിജയ്ക്കൊപ്പവും ബാറ്റ് ചെയ്യാനാണ് തനിക്ക് ഇഷ്ടമെന്നും ഹസി പറഞ്ഞു. ധോണിയെ പോലെ സാഹചര്യങ്ങളെ മനസ്സിലാക്കുന്ന ഒരു താരത്തെ താൻ കണ്ടിട്ടില്ലെന്നും എപ്പോഴൊക്കെ സിക്സ് അടിക്കണമെന്ന് ധോണിക്ക് അറിയാമെന്നും ഹസി പറഞ്ഞു.
ഈ വർഷത്തെ ഇന്ത്യൻ പ്രീമിയർ ലീഗ് നീട്ടിവെച്ചതോടെ മഹേന്ദ്ര സിംഗ് ധോണിയുടെ ഇന്റർനാഷണൽ കരിയർ തുടരുന്നതിന് വലിയ പ്രതിസന്ധി സൃഷ്ടിച്ചിരുന്നു. നിലവിൽ ചെന്നൈ സൂപ്പർ കിങ്സിന്റെ ബാറ്റിംഗ് പരിശീലകൻ കൂടിയാണ് ഹസി.
