ഐസിസി ടെസ്റ്റ് ബൗളർ റാങ്കിംഗിൽ ഇംഗ്ലണ്ടിന്റെ ജെയിംസ് ആൻഡേഴ്സനെ പിന്തള്ളി ഇന്ത്യൻ ക്രിക്കറ്റ് താരം രവിചന്ദ്രൻ അശ്വിൻ ഒന്നാം സ്ഥാനം കരസ്ഥമാക്കി. ഡൽഹിയിൽ ഓസ്ട്രേലിയയ്ക്കെതിരായ ഇന്ത്യയുടെ രണ്ടാം ടെസ്റ്റ് വിജയത്തിൽ ആറ് വിക്കറ്റ് വീഴ്ത്തിയ അശ്വിന്റെ മികച്ച പ്രകടനമാണ് ഒന്നാം സ്ഥാനത്തേക്ക് ഉയരുന്നതിൽ നിർണായകമായത്.
36 കാരനായ ഓഫ് സ്പിന്നർ ടെസ്റ്റ് ബൗളർ റാങ്കിലെ ഒന്നാം സ്ഥാനത്തെത്തുന്നത് ഇതാദ്യമല്ല. 2015ൽ ആദ്യമായി ഈ നേട്ടം കൈവരിച്ച അദ്ദേഹം അതിനുശേഷം ഒന്നിലധികം തവണ ഒന്നാം സ്ഥാനത്തേക്ക് തിരിച്ചെത്തി.
അശ്വിന് ഒപ്പം അദ്ദേഹത്തിന്റെ സഹതാരം രവീന്ദ്ര ജഡേജയും ബൗളിംഗ് റാങ്കിംഗിൽ കുതിപ്പ് നടത്തി, ഓസ്ട്രേലിയക്കെതിരായ ടെസ്റ്റ് മത്സരത്തിൽ 10 വിക്കറ്റ് വീഴ്ത്തിയതിന് ശേഷം എട്ടാം സ്ഥാനത്തേക്ക് ജഡേജ ഉയർന്നു. എംആർഎഫ് ടയേഴ്സ് ഐസിസി ടെസ്റ്റ് ഓൾറൗണ്ടർ റാങ്കിംഗിൽ ഒന്നാം സ്ഥാനത്ത് ജഡേജയാണ് ഉള്ളത്. അശ്വിൻ രണ്ടാം സ്ഥാനത്തും ഉണ്ട്.
