ജർമ്മൻ ക്ലബ് ബയേർ ലെവകുസന്റെ 23 കാരനായ ഇക്വഡോർ പ്രതിരോധ താരം പിയെറോ ഇൻകാപ്പിയെ സ്വന്തമാക്കി ആഴ്സണൽ. നിലവിൽ താരത്തിന്റെ മെഡിക്കൽസ് ഔദ്യോഗിക പ്രഖ്യാപനം എന്നിവ മാത്രമാണ് ബാക്കിയുള്ളത്. ഈ സീസണിൽ ലോണിൽ ആവും താരം ആഴ്സണലിൽ എത്തുക. അടുത്ത സീസണിൽ താരത്തെ 52 മില്യൺ യൂറോ നൽകി ആഴ്സണലിന് സ്വന്തമാക്കാം, ഇതിനു പുറമെ താരത്തെ ആഴ്സണൽ ഭാവിയിൽ വിൽക്കുക ആണെങ്കിൽ 10 ശതമാനവും ജർമ്മൻ ക്ലബിന് ലഭിക്കും. അടുത്ത വർഷം അഞ്ചു വർഷത്തെ കരാർ ആവും ഇൻകാപ്പിയെ ഒപ്പ് വെക്കുക. താരത്തെ സ്വന്തമാക്കണം എന്ന ഉറപ്പ് കരാറിൽ ഇല്ലെങ്കിലും താരത്തെ ആഴ്സണൽ അടുത്ത വർഷം സ്ഥിരകരാറിൽ സ്വന്തമാക്കും എന്നു തന്നെയാണ് സൂചന.
ലെഫ്റ്റ് ബാക്ക് ആയും സെന്റർ ബാക്ക് ആയും കളിക്കുന്ന പിയെറോ ഇൻകാപ്പിയെ പ്രതിരോധത്തിലും മുന്നേറ്റത്തിലും ഒരുപോലെ തിളങ്ങുന്ന താരമാണ്. 2021 ൽ അർജന്റീനൻ ക്ലബിൽ നിന്നു ടീമിൽ എത്തിയ താരം ജർമ്മൻ ക്ലബിനായി 165 മത്സരങ്ങളിൽ താരം ബൂട്ട് കെട്ടിയിട്ടുണ്ട്. ലെവർകുസനു ബുണ്ടസ് ലീഗ കിരീടം നേടി നൽകുന്നതിൽ നിർണായക പങ്ക് വഹിച്ച താരമാണ് ഇൻകാപ്പിയെ. അതേസമയം 25 കാരനായ ആഴ്സണലിന്റെ പോളണ്ട് പ്രതിരോധ താരം ജേക്കബ് കിവിയോർ പോർച്ചുഗീസ് ക്ലബ് എഫ്.സി പോർട്ടോയിൽ ചേരും. താരത്തെ ഈ സീസണിൽ ലോണിൽ ആണ് പോർട്ടോ സ്വന്തമാക്കുക. താരത്തെ അടുത്ത സീസണിൽ നിർബന്ധമായും 27 മില്യൺ പൗണ്ട് നൽകി സ്വന്തമാക്കാനും ഇനി വിൽക്കുക ആണെങ്കിൽ ഒരു വിഹിതം ആഴ്സണലിന് നൽകാനും കരാറിൽ വ്യവസ്ഥയുണ്ട്. പലപ്പോഴും ഗബ്രിയേലിന് പരിക്കേറ്റപ്പോൾ പകരക്കാരനായി വന്നു മികച്ച പ്രകടനം ആണ് കിവിയോർ നടത്തിയത്. 2022 സീസണിൽ ആഴ്സണലിൽ എത്തിയ താരം 68 മത്സരങ്ങളിൽ ആണ് ബൂട്ട് കെട്ടിയത്. തങ്ങളുടെ മറ്റൊരു പ്രതിരോധ താരം സിഞ്ചെങ്കോയെ ലോണിൽ ഫ്രഞ്ച് ക്ലബ് മാഴ്സെയിലേക്ക് അയക്കാനും ആഴ്സണൽ ശ്രമങ്ങൾ തുടരുന്നുണ്ട്.
