ടി20 ലോകകപ്പില്‍ തന്റെ ഏറ്റവും വലിയ വെല്ലുവിളി രോഹിത് ശര്‍മ്മയും വിരാട് കോഹ്‍ലിയും ആയിരിക്കുമെന്ന് അഭിപ്രായപ്പെട്ട് ഹാരിസ് റൗഫ്. മികച്ച ഫോമിലുള്ള താരം ഓസ്ട്രേലിയയിലെ ബിഗ് ബാഷ് ലീഗിലെല്ലാം വിക്കറ്റ് കൊയ്ത്ത് ആവര്‍ത്തിക്കുകയായിരുന്നു. പാക്കിസ്ഥാന്റെ ടി20യിലെ മുന്‍ നിര ബൗളറുടെ ദൗത്യം താരത്തിലേക്കാവും ഇനിയുള്ള കാലത്തിലെത്തുക എന്നാണ് പ്രതീക്ഷിക്കപ്പെടുന്നത്.
ലോകകപ്പ് ആയതിനാല്‍ എല്ലാ രാജ്യങ്ങളിലെയും പ്രധാന താരങ്ങള്‍ ഉണ്ടാകുമെന്നും അവരെല്ലാം വെല്ലുവിളി ഉയര്‍ത്തുക തന്നെ ചെയ്യുമെന്ന് പറഞ്ഞ റൗഫ് എന്നാല്‍ ഇന്ത്യയുടെ വിരാട് കോഹ്‍ലിയും രോഹിത് ശര്‍മ്മയും ആവും തനിക്ക് ഏറ്റവും പ്രധാന വെല്ലുവിളി ഉയര്‍ത്തുക എന്ന് അഭിപ്രായപ്പെട്ടു.
തന്റെ ബിഗ്ബാഷ് പരിചയ സമ്പത്ത് വെച്ച് തനിക്ക് ലോകകപ്പില്‍ മികവ് പുലര്‍ത്താനാകുമെന്നാണ് കരുതുന്നതെന്നും റൗഫ് പറഞ്ഞു. ഓസ്ട്രേലിയയിലാണ് ലോകകപ്പ് നടക്കുന്നതെന്നും തനിക്ക് വിരാട്, രോഹിത് തുടങ്ങിയ മികച്ച താരങ്ങള്‍ക്കെതിരെ മികവ് പുലര്‍ത്താനാകുമെന്ന പ്രതീക്ഷയുണ്ടെന്നും ഹാരിസ് വ്യക്തമാക്കി.
