Local Sports News in Malayalam

ഇന്ത്യയിൽ ഫാസ്റ്റ് ബൗളിംഗ് വിപ്ലവത്തിന് തുടക്കം കുറിച്ചത് ജവഗൽ ശ്രീനാഥ് ആണെന്ന് ലക്ഷ്മൺ

ഇന്ത്യയിൽ ഫാസ്റ്റ് ബൗളിംഗ് വിപ്ലവത്തിന് തുടക്കം കുറിച്ചത് മുൻ ഇന്ത്യൻ ഫാസ്റ്റ് ബൗളർ ജവഗൽ ശ്രീനാഥ് ആണെന്ന് മുൻ ഇന്ത്യൻ താരം വി.വി.എസ്. ലക്ഷ്മൺ. ബൗളിങ്ങിന് അനുകൂലമല്ലാത്ത സാഹചര്യത്തിൽ പോലും ടീമിന്റെ ആവശ്യങ്ങൾക്ക് അനുസരിച്ചുള്ള മികച്ച പ്രകടനം ശ്രീനാഥ് നടത്തിയിട്ടുണ്ടെന്നും ലക്ഷ്മൺ പറഞ്ഞു.

പ്രതികൂലമായ സാഹചര്യത്തിൽ മികച്ച പ്രകടനം പുറത്തെടുക്കാനുള്ള തീക്ഷണമായ ആഗ്രഹമായിരുന്നു ശ്രീനാഥിന്റെ കരുത്തെന്നും ലക്ഷ്മൺ പറഞ്ഞു.  ഇന്ത്യക്ക് വേണ്ടി 1991ൽ അരങ്ങേറ്റം നടത്തിയ ജവഗൽ ശ്രീനാഥ് 67 ടെസ്റ്റുകളും 229 ഏകദിന മത്സരങ്ങളും ഇന്ത്യക്ക് വേണ്ടി കളിച്ചിട്ടുണ്ട്. ടെസ്റ്റിൽ 236 വിക്കറ്റും ഏകദിനത്തിൽ 315 വിക്കറ്റുമാണ് ശ്രീനാഥിന്റെ സമ്പാദ്യം. തന്റെ കൂടെ കളിച്ചതും തനിക്ക് പ്രചോദനം നൽകുകയും ചെയ്ത താരങ്ങളെ കുറിച്ച് സോഷ്യൽ മീഡിയയിൽ കുറിച്ച വരികളിലാണ് ശ്രീനാഥിനെ ലക്ഷ്മൺ പുകഴ്ത്തിയത്.

You might also like