ലോകകപ്പ് നഷ്ടമായാലും സാരമില്ല, ആവശ്യത്തിന് വിശ്രമം എടുത്ത് ആഷസിന് തയ്യാറാകൂ – സ്മിത്തിനോട് ടിം പെയിന്‍

സ്മിത്തിനോട് പരിക്ക് മാറി വേഗം മടങ്ങി വരുവാന്‍ ശ്രമിക്കരുതെന്ന് ടിം പെയിന്റെ ഉപദേശം. ലോകകപ്പ് നഷ്ടമായാലും പ്രശ്നമില്ല പരിക്ക് മാറി ടീമിലേക്ക് ആഷസ് പരമ്പര ലക്ഷ്യമാക്കി എത്തുവാന്‍ സ്മിത്ത് ശ്രമിക്കണമെന്നാണ് ടിം പെയിന്‍ സ്റ്റീവ് സ്മിത്തിനോ്ട ആവശ്യപ്പെട്ടിരിക്കുന്നത്.

സ്മിത്ത് ആഷസിന് പൂര്‍ണ്ണമായും ഫിറ്റാകണമെന്നും അതിന് ടി20 ലോകകപ്പിൽ നിന്ന് വിട്ട് നിന്നാലും പ്രശ്നമില്ലെന്ന് ഓസ്ട്രേലിയന്‍ ടെസ്റ്റ് നായകന്‍ വ്യക്തമാക്കി. കഴിഞ്ഞ ആഷസിൽ നാല് ടെസ്റ്റിൽ നിന്ന് 774 റൺസാണ് സ്മിത്ത് നേടിയത്. ഇതിൽ എഡ്ജ്ബാസ്റ്റണിലെ രണ്ട് ശതകങ്ങളും ഉള്‍പ്പെടുന്നു.

കേപ്ടൗണ്‍ വിവാദത്തിന് ശേഷം മടങ്ങിയെത്തിയ താരത്തിനെതിരെ ഇംഗ്ലണ്ടില കാണികള്‍ കൂവിയാണ് പ്രതിഷേധമുയര്‍ത്തിയതെങ്കിലും താരമാകട്ടേ ബാറ്റ് കൊണ്ടായിരുന്നു മറുപടി നല്‍കിയത്. സ്മിത്ത് ബാറ്റിംഗ് ഗ്രിപ്പ് മാറ്റിയതിൽ പിന്നെയാണ് കൈമുട്ടിന് പരിക്കേറ്റ് ഇപ്പോള്‍ ടീമിന് പുറത്തായത്.