റോയല്‍ ലണ്ടന്‍ കപ്പ് കളിക്കുവാന്‍ ശ്രേയസ്സ് അയ്യരും, താരവുമായി കരാറിലെത്തി ലങ്കാഷയന്‍

Shreyasiyer
- Advertisement -

റോയല്‍ ലണ്ടന്‍ കപ്പിനു വേണ്ടി ഇന്ത്യന്‍ താരം ശ്രേയസ്സ് അയ്യരുമായി കരാറിലെത്തി ലങ്കാഷയര്‍. ജൂലൈ 15 മുതല്‍ ആരംഭിയ്ക്കുന്ന ഒരു മാസം നീണ്ട് നില്‍ക്കുന്ന ലീഗില്‍ മുഴുവനുമായി താരം കളിക്കുമെന്നാണ് അറിയുന്നത്. ക്ലബിന് വേണ്ടി കളിക്കുന്ന ആറാമത്തെ ഇന്ത്യന്‍ താരമായി അയ്യര്‍ മാറും. ഫറൂഖ് എഞ്ചിനിയര്‍, വിവിഎസ് ലക്ഷ്മണ്‍, സൗരവ് ഗാംഗുലി, ദിനേശ് മോംഗിയ, മുരളി കാര്‍ത്തിക് എന്നിവരാണ് മുമ്പ് ലങ്കാഷയറിന് വേണ്ടി കളിച്ചിട്ടുള്ള ഇന്ത്യന്‍ താരങ്ങള്‍.

ഇന്ത്യയ്ക്കായി 21 ഏകദിനങ്ങളും 29 ടി20 മത്സരങ്ങളിലും കളിച്ചിട്ടുള്ള താരമാണ് ശ്രേയസ്സ് അയ്യര്‍. ലങ്കാഷയര്‍ ഇംഗ്ലീഷ് ക്രിക്കറ്റിലെ ഐതിഹാസികമായ ഒരു ക്ലബ് ആണെന്നും ഇന്ത്യന്‍ ക്രിക്കറ്റുമായി ചരിത്രപരമായ ബന്ധമുള്ള ക്ലബിന് വേണ്ടി കളിക്കുവാനായതില്‍ തനിക്ക് ഏറെ സന്തോഷമുണ്ടെന്നും ശ്രേയസ്സ് അയ്യര്‍ വ്യക്തമാക്കി. ശ്രേയസ്സ് അയ്യര്‍ ഇന്ത്യയുടെ അടുത്ത തലമുറയിലെ മുന്‍നിര ബാറ്റ്സ്മാനാണെന്നും അദ്ദേഹത്തെ സ്വന്തമാക്കുവാനായതില്‍ സന്തോഷമുണ്ടെന്നുമാണ് ക്ലബിന്റെ ഡയറക്ടര്‍ ഓഫ് ക്രിക്കറ്റ് പോള്‍ അലോട്ട് പറഞ്ഞത്.

Advertisement