ആഭ്യന്തര ക്രിക്കറ്റിനോടുള്ള പ്രതിബദ്ധതയെക്കുറിച്ചുള്ള ആശങ്കകൾ കാരണം കഴിഞ്ഞ വർഷം കേന്ദ്ര കരാറിൽ നിന്ന് ഒഴിവാക്കപ്പെട്ട ശേഷം ശ്രേയസ് അയ്യരെ ബിസിസിഐ കേന്ദ്ര കരാറിൽ പുനഃസ്ഥാപിക്കാൻ സാധ്യതയുണ്ടെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. മധ്യനിര ബാറ്റർ ഇപ്പോൾ മികച്ച ഫോമിലാണ്, പ്രത്യേകിച്ച് ഏകദിനങ്ങളിൽ, ഈ ഐസിസി ചാമ്പ്യൻസ് ട്രോഫിയിലെ ഇന്ത്യയുടെ ഫൈനൽ വരെയുള്ള യാത്രയിൽ നിർണായക പങ്ക് വഹിച്ചിട്ടുണ്ട്. 195 റൺസ് ഇതുവരെ ചാമ്പ്യൻസ് ട്രോഫിയിൽ നേടി.
ഏകദിനത്തിൽ നാലാം നമ്പറിൽ അയ്യരുടെ പ്രകടനം അസാധാരണമാണ്. 40 ഇന്നിംഗ്സുകളിൽ നിന്ന് 52.15 ശരാശരിയിലും 100.51 സ്ട്രൈക്ക് റേറ്റിലും നാല് സെഞ്ച്വറികളും 12 അർധസെഞ്ചുറികളും സഹിതം 1,773 റൺസ് അദ്ദേഹം നേടിയിട്ടുണ്ട്.
ICC ടൂർണമെൻ്റുകളിൽ, അദ്ദേഹം തൻ്റെ അവസാന എട്ട് ഇന്നിംഗ്സുകളിൽ 82, 77, 128*, 105, 4, 15, 56, 79 എന്നിങ്ങനെ സ്കോർ ചെയ്തു, 110.9 സ്ട്രൈക്ക് റേറ്റോടെ 78 ശരാശരിയിൽ സ്ഥിരത പുലർത്തുന്നു. ഇന്ത്യയുടെ ഏകദിന സെറ്റപ്പിൽ അദ്ദേഹത്തിൻ്റെ പ്രാധാന്യം തിരിച്ചറിഞ്ഞാണ് അദ്ദേഹത്തിൻ്റെ കേന്ദ്ര കരാർ പുനഃസ്ഥാപിക്കുന്നത് ബിസിസിഐ ഇപ്പോൾ പരിഗണിക്കുന്നത്.
