ഓസ്ട്രേലിയൻ താരം ഷോൺ മാർഷിന്റെ ക്രിക്കറ്റ് കരിയറിന് അവസാനം. 2023-24 ബിഗ് ബാഷ് ലീഗിൽ (ബിബിഎൽ) മെൽബൺ റെനഗേഡ്‌സ് പ്ലേഓഫിലേക്ക് കടക്കുന്നതിൽ പരാജയപ്പെട്ടതോടെയാണ് ഷോൺ മാർഷിന്റെ 23 വർഷം നീണ്ട കരിയറിന് തിരശ്ശീല വീണത്. ഇപ്പോൾ നടന്നുകൊണ്ടിരിക്കുന്ന ബിബിഎല്ലിൽ അഞ്ച് മത്സരങ്ങളിൽ മൂന്ന് അർദ്ധ സെഞ്ച്വറികളോടെ 45.25 ശരാശരിയിൽ 181 റൺസ് മാർഷ് നേടിയിരുന്നു..
ഈ വർഷമാദ്യം, 2019 ജനുവരിയിൽ സിഡ്‌നി ക്രിക്കറ്റ് ഗ്രൗണ്ടിൽ ഇന്ത്യയ്‌ക്കെതിരെ അവസാനമായി ടെസ്റ്റ് ക്രിക്കറ്റ് കളിച്ചതിന് ശേഷമാണ് മാർഷ് ഫസ്റ്റ് ക്ലാസ് ക്രിക്കറ്റിൽ നിന്ന് വിരമിച്ചത്. ഈ ബിഗ് ബാഷോടെ ടി20യും വിടുമെന്ന് അദ്ദേഹം പറഞ്ഞിരുന്നു.
ഇന്ത്യൻ പ്രീമിയർ ലീഗിന്റെ (ഐ‌പി‌എൽ) ഉദ്ഘാടന പതിപ്പിൽ ഏറ്റവും കൂടുതൽ റൺസ് നേടിയത് മാർഷ് ആയിരുന്നു. അതിലൂടെ ആയിരുന്നു അദ്ദേഹം ലോക ശ്രദ്ധ നേടിയത്. ഓസ്‌ട്രേലിയയ്‌ക്കായി 38 ടെസ്റ്റുകളിലും 73 ഏകദിനങ്ങളിലും 15 ടി20യിലും അദ്ദേഹം കളിച്ചിട്ടുണ്ട്‌. ടെസ്റ്റിൽ 2265 റൺസും ഏകദിനത്തിൽ 2773 റൺസും ടി20യിൽ 255 റൺസും അദ്ദേഹം ഓസ്ട്രേലിയക്ക് ആയി നേടി. 13 സെഞ്ചുറികളും 25 അർധസെഞ്ചുറികളും മാർഷ് നേടിയിട്ടുണ്ട്.
