ബംഗ്ലാദേശിന് എതിരായ ടി20 പരമ്പരയും ഇന്ത്യ തൂത്തുവാരി. ഇന്ന് നടന്ന അവസാന ടി20 മത്സരം ഇന്ത്യ 133 റൺസിനാണ് വിജയിച്ചത്. ഇന്ത്യ ഉയർത്തിയ 298 എന്ന വൻ സ്കോർ ചെയ്സ് ചെയ്ത ബംഗ്ലാദേശിന് ആകെ 164-7 റൺസ് എടുക്കാനെ ആയുള്ളൂ.
തുടക്കം മുതൽ ആക്രമിച്ചു കളിക്കാൻ ബംഗ്ലാദേശ് ശ്രമിച്ചു എങ്കിലും വിക്കറ്റുകൾ തുടർച്ചയായി നഷ്ടപ്പെട്ടു. 63* റൺസുമായി തൗഹിദ് ഹൃദോയ് ബംഗ്ലാദേശിന്റെ ടോപ് സ്കോറർ ആയി. ലിറ്റൺ ദാസ് 42 റൺസും എടുത്തു.
ഇന്ത്യക്ക് ആയി രവി ബിഷ്ണോയ് 3 വിക്കറ്റും മായങ്ക് യാദവ് 2 വിക്കറ്റും വീഴ്ത്തി.
നേരത്തെ സഞ്ജു സാംസണിൻ്റെ തകർപ്പൻ സെഞ്ചുറിയുടെയും സൂര്യകുമാർ യാദവിൻ്റെ തകർപ്പൻ അർധ സെഞ്ചുറിയുടെയും ബലത്തിൽ ബംഗ്ലാദേശിനെതിരെ ഇന്ത്യ 20 ഓവറിൽ 297/6 എന്ന കൂറ്റൻ സ്കോർ നേടി.
വെറും 47 പന്തിൽ 11 ഫോറും 8 സിക്സും സഹിതം 236.17 സ്ട്രൈക്ക് റേറ്റിൽ 111 റൺസെടുത്ത സഞ്ജു സാംസണാണ് ഇന്നിംഗ്സിലെ താരം. അദ്ദേഹത്തിൻ്റെ ആക്രമണോത്സുകമായ കുതിപ്പ് ഇന്ത്യയുടെ കൂറ്റൻ ടോട്ടലിന് അടിത്തറയിട്ടു. 35 പന്തിൽ 8 ഫോറും 5 സിക്സും ഉൾപ്പെടെ 75 റൺസെടുത്ത സൂര്യകുമാർ യാദവും നിർണായക പങ്കുവഹിച്ചു.
റിയാൻ പരാഗ് 13 പന്തിൽ 34 റൺസും ഹാർദിക് പാണ്ഡ്യ 18 പന്തിൽ 47 റൺസും നേടി ഇന്ത്യയെ ഒരു ടെസ്റ്റ് ടീമിന്റെ ഏറ്റവും ഉയർന്ന ടി20 സ്കോറിൽ എത്തിച്ചു.
