അയര്‍ലണ്ടിനെതിരെ ആദ്യ ഏകദിനത്തിൽ ഒരു ഘട്ടത്തിൽ വലിയ പ്രതിരോധത്തിലായെങ്കിലും 9 വിക്കറ്റ് നഷ്ടത്തിൽ 271 റൺസ് നേടി ദക്ഷിണാഫ്രിക്ക . 91 റൺസ് നേടിയ റയാന്‍ റിക്കൽടണും 79 റൺസ് നേടിയ ട്രിസ്റ്റന്‍ സ്റ്റബ്സും മാത്രമാണ് ദക്ഷിണാഫ്രിക്കന്‍ നിരയിൽ റൺസ് കണ്ടെത്തിയത്. ഒരു ഘട്ടത്തിൽ 39/3 എന്ന നിലയിലേക്ക് വീണ ദക്ഷിണാഫ്രിക്കയെ ഈ കൂട്ടുകെട്ട് 152 റൺസ് കൂട്ടുകെട്ടുമായി തിരിച്ചുവരവ് സാധ്യമാക്കി.
എന്നാൽ റയാനും സ്റ്റബ്സും അടുത്തടുത്ത ഓവറുകളിൽ പുറത്തായത് ദക്ഷിണാഫ്രിക്കയ്ക്ക് തിരിച്ചടിയായി. 191/3 എന്ന നിലയിൽ നിന്ന് ടീം 201/6 എ്ന നിലയിലേക്ക് ഏതാനും ഓവറുകള്‍ക്കുള്ളിൽ വീഴുകയായിരുന്നു. വാലറ്റത്തിൽ ബോര്‍ൺ ഫോര്‍ച്യുന്‍, ലുംഗി എന്‍ഗിഡി എന്നിവര്‍ പൊരുതി നിന്നാണ് ദക്ഷിണാഫ്രിക്കയെ 271/9 എന്ന സ്കോറിലേക്ക് എത്തിച്ചത്. ഫോര്‍ച്യുന്‍ 28 റൺസും എന്‍ഗിഡി 20 റൺസും നേടി.
അയര്‍ലണ്ടിന് വേണ്ടി മാര്‍ക്ക് അഡൈര്‍ നാലും ക്രെയിഗ് യംഗ് മൂന്നും വിക്കറ്റ് നേടി.
