ഈ സീസണിലെ ഐപിഎല്ലിൽ റോയൽ ചലഞ്ചേഴ്സ് ബാംഗ്ലൂരിന് അവരുടെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തിൽ മികച്ച പ്രകടനം കാഴ്ചവെക്കാൻ സാധിച്ചിട്ടില്ല. എവേ മത്സരങ്ങളിൽ തോൽവി അറിയാതെ മുന്നേറുമ്പോഴും സ്വന്തം തട്ടകത്തിലെ മൂന്ന് മത്സരങ്ങളിലും അവർ പരാജയപ്പെട്ടു. ചിന്നസ്വാമിയിലെ പിച്ചിനെക്കുറിച്ച് കൂടുതൽ മനസ്സിലാക്കുന്നതിലൂടെ ഈ പ്രതിസന്ധി മറികടക്കാൻ സാധിക്കുമെന്ന് മുൻ ഇന്ത്യൻ കോച്ച് അനിൽ കുംബ്ലെ അഭിപ്രായപ്പെട്ടു.
ഏപ്രിൽ 24ന് രാജസ്ഥാൻ റോയൽസിനെതിരെ നടക്കുന്ന മത്സരത്തിന് മുന്നോടിയായി സംസാരിക്കുകയായിരുന്നു അദ്ദേഹം. ബാറ്റിംഗ് തിരഞ്ഞെടുക്കുമ്പോൾ പിച്ചിനെ കൃത്യമായി വിലയിരുത്തുന്നതിൽ ടീം പരാജയപ്പെട്ടതാണ് തുടർച്ചയായ തോൽവികൾക്ക് കാരണമെന്ന് കുംബ്ലെ ചൂണ്ടിക്കാട്ടി. “പിച്ചിനെ വിലയിരുത്തുന്നത് വളരെ പ്രധാനമാണ്, അവർക്ക് അതിന് സാധിച്ചിട്ടില്ല,” അദ്ദേഹം പറഞ്ഞു.
ഗുജറാത്ത് ടൈറ്റൻസ്, ഡൽഹി ക്യാപിറ്റൽസ്, പഞ്ചാബ് കിംഗ്സ് എന്നിവർക്കെതിരെ ചിന്നസ്വാമിയിൽ വെച്ച് നടന്ന മത്സരങ്ങളിൽ ആർസിബി പരാജയപ്പെട്ടിരുന്നു. ഈ വേദിയിൽ മികച്ച സ്കോർ നേടാനോ പിന്തുടർന്ന് വിജയിക്കാനോ അവരുടെ ബാറ്റിംഗ് നിരയ്ക്ക് സാധിച്ചിട്ടില്ല. പിച്ചിന്റെ സ്വഭാവം പ്രവചനാതീതമാണെന്ന് ക്യാപ്റ്റൻ രജത് പാട്ടിദാർ സമ്മതിച്ചെങ്കിലും അതിനെ ഒരു ഒഴികഴിവായി കാണാനാവില്ലെന്ന് അദ്ദേഹം വ്യക്തമാക്കി.
