2026-ലെ ടി20 ലോകകപ്പ് ബഹിഷ്കരിക്കുമെന്ന പാകിസ്ഥാൻ ക്രിക്കറ്റ് ബോർഡിന്റെ (പിസിബി) ഭീഷണി വെറും നാടകം മാത്രമാണെന്ന് മുൻ ഇന്ത്യൻ താരം അജിങ്ക്യ രഹാനെ. ബംഗ്ലാദേശിനെ ടൂർണമെന്റിൽ നിന്ന് പുറത്താക്കിയതിൽ പ്രതിഷേധിച്ച് പിസിബി അധ്യക്ഷൻ മൊഹ്സിൻ നഖ്വി ലോകകപ്പ് ബഹിഷ്കരണ സൂചനകൾ നൽകിയിരുന്നു. എന്നാൽ ഇതിനെ ശക്തമായ ഭാഷയിൽ വിമർശിച്ച രഹാനെ, ലോകകപ്പ് പോലുള്ള വലിയൊരു ടൂർണമെന്റ് ഉപേക്ഷിക്കാനുള്ള ധൈര്യം പാകിസ്ഥാനില്ലെന്ന് ക്രിക്ബസിനോട് (Cricbuzz) പറഞ്ഞു.
“അവർക്ക് അതിനുള്ള ധൈര്യമുണ്ടെന്ന് ഞാൻ കരുതുന്നില്ല, അവർ തീർച്ചയായും കളിക്കാൻ വരും,” എന്നായിരുന്നു രഹാനെയുടെ പരിഹാസം.
ശ്രീലങ്കയിലെ കൊളംബോ, പല്ലെക്കെലെ എന്നിവിടങ്ങളിലായി നടക്കുന്ന തങ്ങളുടെ മത്സരങ്ങൾക്കായി പാകിസ്ഥാൻ ടീം ഇതിനോടകം തന്നെ ടിക്കറ്റുകൾ ബുക്ക് ചെയ്തതായാണ് റിപ്പോർട്ടുകൾ. ഫെബ്രുവരി 15-ന് കൊളംബോയിൽ നടക്കാനിരിക്കുന്ന ഇന്ത്യ-പാക് മത്സരത്തിൽ നിന്ന് പാകിസ്ഥാൻ പിന്മാറിയേക്കുമെന്ന് അഭ്യൂഹങ്ങളുണ്ടായിരുന്നു. എങ്കിലും ഐസിസി (ICC) ഏർപ്പെടുത്താനിടയുള്ള കനത്ത പിഴയും ഏഷ്യാ കപ്പ് അടക്കമുള്ള ടൂർണമെന്റുകളിൽ നിന്നുള്ള വിലക്കും ഭയന്ന് പിസിബി അന്തിമ തീരുമാനത്തിൽ നിന്ന് പിന്മാറാനാണ് സാധ്യത. ഫെബ്രുവരി 2-നകം പാകിസ്ഥാൻ സർക്കാർ ഇക്കാര്യത്തിൽ അന്തിമ തീരുമാനം അറിയിക്കുമെന്നാണ് നഖ്വി വ്യക്തമാക്കിയത്.
പാകിസ്ഥാന്റെ ഈ നിലപാട് വെറും രാഷ്ട്രീയ തന്ത്രം മാത്രമാണെന്നാണ് കായിക നിരീക്ഷകരും വിലയിരുത്തുന്നത്. സാമ്പത്തിക പ്രതിസന്ധിയും ആരാധകരുടെ സമ്മർദ്ദവും നിലനിൽക്കുന്ന സാഹചര്യത്തിൽ ലോകകപ്പ് ഉപേക്ഷിക്കുന്നത് പാകിസ്ഥാൻ ക്രിക്കറ്റിന് തന്നെ വലിയ തിരിച്ചടിയാകും. ഫെബ്രുവരി 7-ന് നെതർലൻഡ്സിനെതിരെയാണ് പാകിസ്ഥാന്റെ ആദ്യ മത്സരം.
