ന്യൂസിലൻഡിന് എതിരായ മൂന്നാം ടെസ്റ്റിൽ ഇന്ത്യ വിജയത്തിനായി പൊരുതുന്നു. ലഞ്ചിന് പിരിയുമ്പോൾ ഇന്ത്യ 92-6 എന്ന നിലയിലാണ്. വിജയിക്കാൻ ഇന്ത്യക്ക് ഇനി 55 റൺസ് ആണ് വേണ്ടത്. റിഷഭ് പന്ത് ആണ് ഇന്ത്യയുടെ ഏക പ്രതീക്ഷ.
147 എന്ന വിജയലക്ഷ്യം പിന്തുടരുന്ന ഇന്ത്യക്ക് അത്ര നല്ല തുടക്കമല്ല ലഭിച്ചത്. 29-5 എന്ന നിലയിൽ തുടക്കത്തിൽ തന്നെ പതറുന്ന ഇന്ത്യയെ ആണ് കാണാൻ ആയത്. 11 റൺസ് എടുത്ത രോഹിത് ശർമ്മ, 5 റൺസ് എടുത്ത ജയ്സ്വാൾ, ഗിൽ (1), കോഹ്ലി (1), സർഫറാസ് (1) എന്നിവർ പെട്ടെന്ന് തന്നെ കൂടാരം കയറി.
പന്തും ജഡേജയും ചേർന്ന് ഇന്ത്യക്ക് പ്രതീക്ഷ നൽകി എങ്കിലും 22 പന്തിൽ നിന്ന് 6 റൺസ് എടുത്ത് ജഡേജയും മടങ്ങി. ഇന്ത്യ ഇതോടെ 71-6 എന്നായി.
റിഷഭ് പന്ത് ആക്രമിച്ചു കളിച്ച് പെട്ടെന്ന് റൺസ് സ്കോർ ചെയ്തു. പന്ത് 50 പന്തിൽ 53 റൺസുമായി ക്രീസിൽ നിൽക്കുകയാണ്. 1 സിക്സും 7 ഫോറും പന്ത് അടിച്ചു. 6 റൺസുമായി വാഷിംഗ്ടൺ സുന്ദറും ക്രീസിൽ ഉണ്ട്.
അജാസ് പട്ടേൽ ന്യൂസിലൻഡിനായി നാലു വിക്കറ്റുകൾ വീഴ്ത്തിയപ്പോൾ മാറ്റ് ഹെൻറിയും ഗ്ലെൻ ഫിലിപ്സും 1 വിക്കറ്റ് വീതവും വീഴ്ത്തി.
