മൂന്നാം ദിവസം പൂര്‍ണ്ണമായി നഷ്ടമായതിന് ശേഷം നാലാം ദിവസം കളി പുനരാരംഭിച്ച് ഏതാനും ഓവറുകള്‍ക്കുള്ളില്‍ പാക്കിസ്ഥാന് ഇന്നിംഗ്സിന് അവസാനം. അവശേഷിച്ച ഒരു വിക്കറ്റ് സ്റ്റുവര്‍ട് ബ്രോഡ് വീഴ്ത്തിയതോടെയാണ് പാക്കിസ്ഥാന് ഇന്നിംഗ്സ് 236 റണ്‍സില്‍ അവസാനിച്ചത്. മുഹമ്മദ് റിസ്വാന്‍ 72 റണ്‍സ് നേടി അവസാന വിക്കറ്റായി പുറത്തായി.
91.2 ഓവറിലാണ് പാക്കിസ്ഥാന് ഇന്നിംഗ്സ് അവസാനിച്ചത്. അവസാന രണ്ട് വിക്കറ്റ് കൂട്ടുകെട്ടില്‍ നിന്ന് റിസ്വാന്‍ 60 റണ്‍സാണ് നേടിയത്. മികച്ച തുടക്കം കിട്ടിയില്ലെങ്കിലും പാക്കിസ്ഥാന് ഭേദപ്പെട്ട സ്കോറിലേക്ക് എത്താനായതിന് നന്ദി പറയേണ്ടത് മുഹമ്മദ് റിസ്വാനോടാണ്. ഒരു റണ്‍സുമായി നസീം ഷാ പുറത്താകാതെ നിന്നു.
ആബിദ് അലിയാണ്(60) ഇന്നിംഗ്സില്‍ റണ്‍സ് കണ്ടെത്തിയ മറ്റൊരു താരം. ബാബര്‍ അസം 47 റണ്‍സ് നേടി പുറത്തായി. ഇംഗ്ലണ്ടിനായി ബ്രോഡ് നാലും ജെയിംസ് ആന്‍ഡേഴ്സണ്‍ മൂന്നും വിക്കറ്റ് ആദ്യ ഇന്നിംഗ്സില്‍ നേടി.
