കറാച്ചി: പാകിസ്ഥാൻ സൂപ്പർ ലീഗിലെ (പിഎസ്എൽ) ടീമായ മുൾട്ടാൻ സുൽത്താൻസ് ഫലസ്തീൻ പിന്തുണയുമായി ഒരു സവിശേഷമായ കാമ്പെയ്ന് തുടക്കം കുറിച്ചു. ഈ സീസണിൽ തങ്ങളുടെ കളിക്കാർ നേടുന്ന ഓരോ സിക്സറിനും വിക്കറ്റിനും ഒരു ലക്ഷം രൂപ (ഏകദേശം 356 ഡോളർ) പാലസ്തീൻ ചാരിറ്റികൾക്ക് സംഭാവന ചെയ്യുമെന്ന് ടീം അറിയിച്ചു.
ഫ്രാഞ്ചൈസി ഉടമ അലി ഖാൻ തരീൻ ഒരു വീഡിയോ സന്ദേശത്തിലൂടെയാണ് ഈ ക്യാമ്പയിൻ പ്രഖ്യാപിച്ചത്. പാലസ്തീനിലെ കുട്ടികൾക്കായി പ്രവർത്തിക്കുന്ന ഫൗണ്ടേഷനുകളെ സഹായിക്കുകയാണ് തങ്ങളുടെ ലക്ഷ്യമെന്നും അദ്ദേഹം വ്യക്തമാക്കി.
റാവൽപിണ്ടിയിൽ നടന്ന വർണ്ണാഭമായ ഉദ്ഘാടന ചടങ്ങുകളോടെ പിഎസ്എൽ സീസൺ കഴിഞ്ഞ ദിവസം ആരംഭിച്ചു. ആദ്യ മത്സരങ്ങളിൽ ക്വേറ്റ ഗ്ലാഡിയേറ്റേഴ്സ് പെഷവാർ സൽമിക്കെതിരെ 80 റൺസിൻ്റെ തകർപ്പൻ വിജയം നേടി. മറ്റൊരു ആവേശകരമായ മത്സരത്തിൽ ജെയിംസ് വിൻസിൻ്റെ തകർപ്പൻ സെഞ്ചുറിയുടെ (101) ബലത്തിൽ കറാച്ചി കിംഗ്സ് മുൾട്ടാൻ സുൽത്താൻസ് ഉയർത്തിയ 234/3 എന്ന വലിയ സ്കോർ മറികടന്നു.
