ഏറ്റവും പുതിയ ടെസ്റ്റ് റാങ്കിങ്ങിൽ ഒന്നാം സ്ഥാനം നിലനിർത്തി ഇന്ത്യൻ ക്യാപ്റ്റൻ വിരാട് കോഹ്‌ലി. 922 പോയിന്റ് നേടിയാണ് വിരാട് കോഹ്‌ലി ഒന്നാം സ്ഥാനം നിലനിർത്തിയത്. കോഹ്‌ലി അവസാനമായി കളിച്ചത് ഓസ്ട്രേലിയകെതിരായ പരമ്പര ആയിരുന്നു. ആ പരമ്പര ഇന്ത്യ 2-1ന് ജയിച്ചിരുന്നു. 913 പോയിന്റ് നേടി ന്യൂസിലാൻഡിന്റെ കെയ്ൻ വില്യംസൺ ആണ് റാങ്കിങ്ങിൽ രണ്ടാം സ്ഥാനത്ത്. 881 പോയിന്റ് നേടി ഇന്ത്യൻ ബാറ്റ്സ്മാൻ ചേതേശ്വർ പൂജാരയാണ് പട്ടികയിൽ മൂന്നാം സ്ഥാനത്ത്.
ടീമുകളുടെ റാങ്കിങ്ങിൽ ഇന്ത്യ തന്നെയാണ് ഒന്നാം സ്ഥാനത്ത്. ന്യൂസിലാൻഡ് രണ്ടാം സ്ഥാനത്തും സൗത്ത് ആഫ്രിക്ക മൂന്നാം സ്ഥാനത്തും ഇംഗ്ലണ്ട് നാലാം സ്ഥാനത്തും ഓസ്ട്രേലിയ അഞ്ചാം സ്ഥാനത്തുമാണ്. ബൗളർമാരിൽ ഒന്നാം സ്ഥാനത്ത് ഓസ്‌ട്രേലിയൻ ഫാസ്റ്റ് ബൗളർ പാറ്റ് കമ്മിൻസ് ആണ്. രണ്ടാം സ്ഥാനത്ത് ഇംഗ്ലണ്ട് ഫാസ്റ്റ് ബൗളർ ജെയിംസ് ആൻഡേഴ്സണും മൂന്നാം സ്ഥാനത്ത് സൗത്ത് ആഫ്രിക്കൻ ബൗളർ റബാഡയുമാണ്. ബൗളർമാരിൽ ആദ്യ 10 സ്ഥാനങ്ങളിൽ രണ്ട് ഇന്ത്യൻ ബൗളർമാർ ഇടം പിടിച്ചിട്ടുണ്ട്. ആറാം സ്ഥാനത്തുള്ള രവീന്ദ്ര ജഡേജയും പത്താം സ്ഥാനത്തുള്ള അശ്വിനുമാണ് ഈ പട്ടികയിൽ ഉള്ള ഇന്ത്യൻ താരങ്ങൾ.
