ഇന്ത്യൻ താരം കെ എൽ രാഹുൽ ആഭ്യന്തര റെഡ് ബോൾ ക്രിക്കറ്റിലേക്ക് തിരിച്ചെത്തുന്നു. ജനുവരി 29-ന് മുള്ളൻപൂരിൽ ആരംഭിക്കുന്ന പഞ്ചാബിനെതിരായ കർണാടകയുടെ നിർണ്ണായകമായ രഞ്ജി ട്രോഫി മത്സരത്തിൽ താൻ കളിക്കുമെന്ന് രാഹുൽ സ്ഥിരീകരിച്ചു. എന്നാൽ ജനുവരി 22-ന് ആലൂരിൽ മധ്യപ്രദേശിനെതിരെ നടക്കുന്ന മത്സരത്തിൽ അദ്ദേഹം പങ്കെടുക്കില്ല.
വരാനിരിക്കുന്ന അന്താരാഷ്ട്ര മത്സരങ്ങൾക്ക് മുന്നോടിയായി പ്രമുഖ താരങ്ങൾ ആഭ്യന്തര ക്രിക്കറ്റിൽ സജീവമാകണമെന്ന ബിസിസിഐയുടെ നിർദ്ദേശത്തിന് പിന്നാലെയാണ് രാഹുലിന്റെ ഈ തീരുമാനം. ഇതോടെ, പഞ്ചാബും കർണാടകയും തമ്മിലുള്ള പോരാട്ടം ഏറെ ആവേശകരമാകുമെന്ന് ഉറപ്പായി.
ഈ മത്സരത്തിൽ പഞ്ചാബിനായി ഇന്ത്യൻ ടെസ്റ്റ് നായകൻ ശുഭ്മാൻ ഗില്ലും കളിക്കാൻ സാധ്യതയുണ്ട്. ഗില്ലും രാഹുലും നേർക്കുനേർ വരുന്നത് രഞ്ജി ട്രോഫിയുടെ പ്രാധാന്യം വർദ്ധിപ്പിക്കും.
