ദക്ഷിണാഫ്രിക്കയ്ക്കെതിരായ നിലവിലെ ടി20 ഐ പരമ്പരയിൽ ശുഭ്മാൻ ഗില്ലിന്റെ സമീപകാല ഫോമിനെ വിമർശിച്ച് മുൻ ഇന്ത്യൻ ക്രിക്കറ്റ് താരം മുഹമ്മദ് കൈഫ്. ലഖ്നൗവിലും അഹമ്മദാബാദിലും നടക്കുന്ന ശേഷിക്കുന്ന മത്സരങ്ങളിൽ ഇന്ത്യൻ ടീം മാനേജ്മെന്റ് “ഗില്ലിന് ഒരു ബ്രേക്ക് നൽകി” സഞ്ജു സാംസണെ ടീമിൽ ഉൾപ്പെടുത്തണമെന്ന് കൈഫ് തന്റെ യൂട്യൂബ് ചാനലിൽ അഭിപ്രായപ്പെട്ടു.
ചെറിയ ഫോർമാറ്റിൽ റൺസ് നേടാൻ ബുദ്ധിമുട്ടുന്ന ഗില്ലിന് ടി20 ടീമിലേക്ക് തിരിച്ചെത്തിയതിന് ശേഷം മതിയായ അവസരങ്ങൾ ലഭിച്ചിട്ടുണ്ടെന്ന് കൈഫ് ഊന്നിപ്പറഞ്ഞു. “കാര്യങ്ങൾ നിയന്ത്രിച്ചു നിർത്തണമെങ്കിൽ, ഗില്ലിനെ ‘ഡ്രോപ്പ് ചെയ്യുക’ എന്ന വാക്ക് ഉപയോഗിക്കേണ്ട (ഗില്ലിന്റെ കാര്യത്തിൽ). അദ്ദേഹത്തിന് വിശ്രമം നൽകുകയാണെന്നോ, അല്ലെങ്കിൽ മറ്റൊരു കളിക്കാരനെ പരീക്ഷിക്കാൻ ആഗ്രഹിക്കുന്നു എന്നോ പറയാവുന്നതാണ്,” കൈഫ് പറഞ്ഞു.
“അദ്ദേഹം ഒരു വർഷമായി കളിക്കുന്നു, എന്നാൽ ഞാൻ 2-3 മോശം ഇന്നിംഗ്സുകൾക്ക് ശേഷം പുറത്താക്കപ്പെട്ടിട്ടുണ്ട്. എന്ന് പുറത്തിരിക്കുന്ന കളിക്കാരൻ ചിന്തിക്കുന്നുണ്ടാകും.” കൈഫ് പറഞ്ഞു.
