ഇംഗ്ലണ്ടിൻ്റെ സ്റ്റാർ പേസർ ജോഫ്ര ആർച്ചർ ഐപിഎൽ 2025 സീസണിൻ്റെ ഭാഗമാകില്ല, കാരണം വരാനിരിക്കുന്ന മെഗാ ലേലത്തിനായി ഷോർട്ട്‌ലിസ്റ്റ് ചെയ്ത 574 കളിക്കാരുടെ പട്ടികയിൽ നിന്ന് അദ്ദേഹം പുറത്തായി. നവംബർ 24, 25 തീയതികളിൽ ജിദ്ദയിൽ ആണ് ലേലം നടക്കുന്നത്.
ആർച്ചർ ഈ സീസണിൽ ലഭ്യമല്ലാത്തതിനാലാണ് അദ്ദേഹത്തെ ലേല പട്ടികയിൽ നിന്ന് ഒഴിവാക്കിയത്. 2025-ൽ ഇന്ത്യയ്‌ക്കെതിരായി നടക്കുന്ന ഇംഗ്ലണ്ടിൻ്റെ സമ്മർ ടെസ്റ്റ് പരമ്പരയിൽ ഫിറ്റ്നസ് നിലനിർത്തുന്നതിൽ കേന്ദ്രീകരിക്കാൻ ആണ് ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ് (ഇസിബി) ആർച്ചറിനെ ഐ പി എല്ലിൽ നിന്ന് മാറ്റിനിർത്തുന്നത്.
2022, 2024 ഐപിഎൽ സീസണുകളിൽ ആർച്ചറിന് ഫിറ്റ്നസ് കാരണം കളിക്കാൻ ആയിരുന്നില്ല. 2023-ൽ മുംബൈ ഇന്ത്യൻസിൻ്റെ ഭാഗമായിരുന്നെങ്കിലും ഏതാനും മത്സരങ്ങൾക്ക് ശേഷം പരിക്ക് മൂലം പുറത്തായി. 2018-ൽ രാജസ്ഥാൻ റോയൽസിനൊപ്പമായിരുന്നു അദ്ദേഹത്തിൻ്റെ ഐപിഎൽ അരങ്ങേറ്റം. പിന്നീട് 2022 ലെ മെഗാ ലേലത്തിൽ അദ്ദേഹം എംഐയിൽ ചേർന്നു. ഇതുവരെ 40 ഐപിഎൽ മത്സരങ്ങൾ കളിച്ച ആർച്ചർ 48 വിക്കറ്റുകൾ ഐ പി എല്ലിൽ നേടിയിട്ടുണ്ട്.
