അയര്‍ലണ്ടിനെതിരെ നാളെ നടക്കാനിരിക്കുന്ന ഇംഗ്ലണ്ട് ടീമില്‍ നിന്ന് പുറത്തായി ജെയിംസ് ആന്‍ഡേഴ്സണ്‍. താരം പരിക്കിന്റെ പിടിയിലായിരുന്നുവെങ്കിലും അയര്‍ലണ്ടിനെതിരെയുള്ള സ്ക്വാഡില്‍ ഇംഗ്ലണ്ട് ഉള്‍പ്പെടുത്തുകയായിരുന്നു. താന്‍ വേഗത്തില്‍ സുഖം പ്രാപിക്കുകയാണെന്ന് കഴിഞ്ഞ ദിവസം താരം തന്നെ വെളിപ്പെടുത്തിയിരുന്നു, എന്നാല്‍ ബുധനാഴ്ച മാത്രമേ കളിക്കുന്ന കാര്യത്തില്‍ അന്തിമ തീരുമാനം എടുക്കുകയുള്ളുവെന്ന് താരം തന്നെ വ്യക്തമാക്കുകയും ചെയ്തിരുന്നു. ജൂലൈ 2ന് കൗണ്ടി മത്സരത്തിനിടെയാണ് താരത്തിന് പരിക്കേറ്റത്.
താരത്തെ ആഷസിലെ ആദ്യ ടെസ്റ്റിന് വേണ്ടി പൂര്‍ണ്ണ നിരീക്ഷണത്തില്‍ തന്നെയായിരിക്കുമെന്ന് ഇംഗ്ലണ്ട് അറിയിച്ചിട്ടുണ്ട്. ഇതോടെ ടീമിലേക്ക് എത്തുവാന്‍ ഒല്ലി സ്റ്റോണോ ലൂയിസ് ഗ്രിഗറിയ്ക്കോ അവസരം തുറന്നിരിക്കുകയാണ്. ഇരുവരും തങ്ങളുടെ ടെസ്റ്റ് അരങ്ങേറ്റമാവും കളിക്കുവാന്‍ അവസരം ലഭിച്ചാല്‍ നടത്തുക.
