സൂര്യകുമാർ ടീമിൽ ഉള്ളത് ഭാഗ്യമാണെന്ന് ഹാർദിക് പാണ്ഡ്യ. ഇന്നലെ നടന്ന മത്സരത്തിൽ സൂര്യകുമാർ സെഞ്ച്വറിയുമായി മുംബൈ ഇന്ത്യൻസിനെ വിജയത്തിലേക്ക് നയിച്ചിരുന്നു. ഇതിനു ശേഷം സംസാരിക്കുക ആയിരുന്നു ഹാർദിക് പാണ്ഡ്യ.
“സൂര്യയുടെ ഇന്നിംഗ്സ് അവിശ്വസനീയമായിരുന്നു. അവൻ റൺസ് നേടുന്നതിനേക്കാൾ അപ്പുറം , ബൗളർമാരിൽ വളരെയധികം സമ്മർദ്ദം ചെലുത്തി, അത് മറ്റ് ബാറ്റർമാർക്കും അയഞ്ഞ പന്തുകൾ ലഭിക്കാൻ കാരണമാകുന്നു. അവൻ എതിരാളികളെ തകർക്കുന്നു. എൻ്റെ ടീമിൽ അദ്ദേഹത്തെ കിട്ടിയത് ഭാഗ്യമാണ്. ഇനിയും ഇത്തരത്തിൽ നിരവധി ഇന്നിംഗ്‌സുകൾ അദ്ദേഹത്തിൽ നിന്ന് ഉണ്ടാകുമെന്ന് പ്രതീക്ഷിക്കുന്നു,” ഹാർദിക് മത്സരത്തിന് ശേഷമുള്ള ചടങ്ങിൽ പറഞ്ഞു.
മുംബൈ ഇന്ത്യനൈന്റെ പ്ലേ ഓഫ് സാധ്യതകളെ കുറിച്ച് താൻ ചിന്തിക്കുന്നില്ല എന്നും ഹാർദിക് പറഞ്ഞു. “നമ്മുക്ക് യോഗ്യത നേടാൻ വേണ്ട കണക്കുകളുടെ സാഹചര്യത്തെ കുറിച്ച് എനിക്കറിയില്ല, പക്ഷേ ഞങ്ങൾ ഇന്ന് കളിച്ച രീതിയിൽ സന്തോഷമുണ്ട്. എങ്കിലും 15-20 റൺസ് ഞങ്ങൾ അധികമായി നൽകിയെന്ന് എനിക്ക് തോന്നുന്നു.” ഹാർദിക് പറഞ്ഞു.
