രാജസ്ഥാൻ റോയൽസിന്റെ ക്യാപ്റ്റനായി ആദ്യ മത്സരത്തിൽ തന്നെ സെഞ്ച്വറി നേടി മലയാളി താരം സഞ്ജു സാംസൺ. പഞ്ചാബ് കിങ്സിനെതിരായ മത്സരത്തിൽ മൂന്നാമനായി ഇറങ്ങിയാണ് സഞ്ജു സാംസൺ സെഞ്ച്വറി നേടിയത്. 63 പന്തിൽ നിന്ന് 119 റൺസാണ് സഞ്ജു സാംസൺ നേടിയത്. 7 സിക്സുകളും 12 ബൗണ്ടറികളും നിറഞ്ഞതായിരുന്നു സഞ്ജു സാംസന്റെ ഇന്നിംഗ്സ്.
എന്നാൽ മത്സരത്തിൽ സെഞ്ച്വറി നേടിയെങ്കിലും രാജസ്ഥാൻ റോയൽസിനെ വിജയത്തിലേക്ക് നയിക്കാൻ സഞ്ജു സാംസണ് ആയില്ല. അവസാന പന്ത് വരെ ആവേശം നിറഞ്ഞ മത്സരത്തിൽ 4 റൺസിന് പഞ്ചാബ് കിങ്സ് രാജസ്ഥാൻ റോയൽസിനെ പരാജയപെടുത്തുകയായിരുന്നു. മത്സരത്തിൽ അവസാന പന്തിൽ അർശദ്വീപ് സിങ്ങിന് വിക്കറ്റ് നൽകിയാണ് സഞ്ജു മടങ്ങിയത്. നേരത്തെ ആദ്യം ബാറ്റ് ചെയ്ത പഞ്ചാബ് കിങ്സ് 6 വിക്കറ്റ് നഷ്ടത്തിൽ 221 റൺസ് എടുത്തിരുന്നു. മറുപടി ബാറ്റിങ്ങിന് ഇറങ്ങിയ രാജസ്ഥാൻ റോയൽസിന് 7 വിക്കറ്റ് നഷ്ടത്തിൽ 217 റൺസ് എടുക്കാൻ മാത്രമാണ് കഴിഞ്ഞത്.
