ഇന്ന് ഐ പി എൽ ക്വാളിഫയറിൽ രണ്ടാം ഇന്നിങ്സിൽ പിച്ച് സ്പിന്നിന് ഏറെ അനുകൂലമായി മാറി എന്ന് രാജസ്ഥാൻ ക്യാപ്റ്റൻ സഞ്ജു സാംസൺ. ഡ്യൂ ഇല്ലാതെ വന്നത് സൺ റൈസേഴ്സ് സ്പിന്നർമാർക്ക് തുണയായി എന്നും സഞ്ജു മത്സര ശേഷം പറഞ്ഞു. ഇന്ന് സൺ റൈസേഴ്സ് രാജസ്ഥാനെതിരെ ഏകപക്ഷീയമായ വിജയം നേടിക്കൊണ്ട് ഫൈനലിലേക്ക് മുന്നേറിയിരുന്നു.
“സൺ റൈസേഴ്സിന്റെ സ്പിന്നിനെതിരെ മധ്യ ഓവറുകളിൽ ഞങ്ങൾക്ക് ഒന്നും ചെയ്യാനായില്ല., അവിടെയാണ് ഞങ്ങൾ കളി തോറ്റത്. രണ്ടാം ഇന്നിംഗ്സിൽ വിക്കറ്റ് വ്യത്യസ്തമായി പെരുമാറാൻ തുടങ്ങി, പന്ത് അൽപ്പം അധികം ടേൺ ചെയ്യാൻ തുടങ്ങി, അവർ ആ നേട്ടം നന്നായി ഉപയോഗിച്ചു. ഞങ്ങളുടെ വലംകൈയ്യൻ ബാറ്റ്‌സ്മാൻമാർക്കെതിരെ മധ്യ ഓവറുകളിൽ അവരുടെ സ്പിൻ ബൗളർമാർ വളരെ നന്നായി പന്തെറിഞ്ഞു. അവിടെയാണ് അവർ ഞങ്ങൾക്കെതിരെ മുന്നേറിയത്.” സഞ്ജു പറഞ്ഞു.
“അവരുടെ ഇടങ്കയ്യൻ സ്പിന്നിനെതിരെ, ഞങ്ങൾ കുറച്ചുകൂടി റിവേഴ്സ്-സ്വീപ്പ് ചെയ്യാൻ ശ്രമിക്കണമായിരുന്നു. അല്ലെങ്കിൽ ക്രീസ് കുറച്ചുകൂടി ഉപയോഗിക്കാമായിരുന്നു. അവർ വളരെ നന്നായി പന്തെറിഞ്ഞു.” സഞ്ജു പറഞ്ഞു.
