രാജസ്ഥാന്‍ ബൗളിംഗിന്റെ അവസാനത്തോടെ ഒരു ക്യാച്ച് പൂര്‍ത്തിയാക്കുന്നതിനിടെ ജോസ് ബട്‍ലറുടെ കൈവിരലുകള്‍ക്ക് പരിക്കേറ്റ് സ്റ്റിച്ച് ഇടേണ്ടി വന്നിരുന്നു. ഇതിനെത്തുടര്‍ന്ന് രാജസ്ഥാന്‍ ഓപ്പണിംഗിൽ രവിചന്ദ്രന്‍ അശ്വിനെയാണ് പരീക്ഷിച്ചത്.
ഓപ്പണിംഗ് സ്ഥാനത്ത് മുന്‍ പരിചയമുള്ള ദേവ്ദത്ത് പടിക്കൽ ടീമിലുള്ളപ്പോളാണ് രാജസ്ഥാന്റെ ഈ പരീക്ഷണം. ജോസ് ബട്‍ലറുടെ കൈയിലെ സ്റ്റിച്ചിടുവാന്‍ സമയം വേണ്ടി വന്നതിനാലാണ് അശ്വിനെ ഓപ്പണിംഗിൽ ഇറക്കിയത് എന്ന് വ്യക്തമാക്കിയ സഞ്ജു പടിക്കലിനെ മധ്യ നിരയിൽ തന്നെ നിലനിര്‍ത്തിയത് പഞ്ചാബിന്റെ സ്പിന്നര്‍മാരെ നേരിടുവാന്‍ വേണ്ടിയായിരുന്നു.
ഇടംകൈയ്യന്‍ ബാറ്റ്സ്മാനായ പടിക്കലിന് ലെഗ് സ്പിന്നറെയും ലെഫ്ട് ആം സ്പിന്നറെയും കളിക്കുവാന്‍ അനായാസം കഴിയുമെന്ന ചിന്തയിലായിരുന്നു ടീമിന്റെ ഈ നീക്കമെന്നും സഞ്ജു പറഞ്ഞു.
ഇടം കൈയ്യന്‍ ബാറ്റ്സ്മാന്‍ ക്രീസിലുള്ളപ്പോള്‍ സിക്സുകള്‍ നേടാനാകുമെന്നായിരുന്നു ടീം മാനേജ്മെന്റിന്റെ ചിന്ത. എന്നാൽ പടിക്കൽ ബാറ്റിംഗിൽ വളരെ പ്രയാസപ്പെടുകയായിരുന്നു.
