ഓറഞ്ച് ക്യാപ്പിനായി റൺസ് മാത്രമല്ല സ്ട്രൈക്ക് റേറ്റ് കൂടി കണക്കിലെടുത്തുള്ള ഒരു ഫോര്‍മുലയാകും മികച്ചതെന്ന് പറഞ്ഞ് എ ബി ഡിവില്ലിയേഴ്സും ടോം മൂഡിയും. മൂഡി ഈ ആശയം പറഞ്ഞപ്പോള്‍ പിന്തുണയുമായി എത്തിയ എബിഡി പറഞ്ഞത് താന്‍ ഇത് ഏറെക്കാലമായി ആവശ്യപ്പെടുന്ന കാര്യമാണെന്നാണ്.
മൂഡി ട്വിറ്ററിലൂടെയാണ് ഇക്കാര്യം അറിയിച്ചത്. ഈ ഫോര്‍മുല മധ്യനിര ബാറ്റ്സ്മാന്മാര്‍ക്കും ഓറഞ്ച് ക്യാപ് നേടുവാനുള്ള ഒരവസരം നൽകുമെന്നും അല്ലാത്ത പക്ഷം അവര്‍ ഒരിക്കലും ഈ നേട്ടത്തിന് അര്‍ഹരാകുമെന്ന് കരുതുന്നില്ലെന്നും മൂഡി പറഞ്ഞു.
താന്‍ ഇക്കാര്യം വര്‍ഷങ്ങളായി പറയുകയാണെന്നും ഇപ്പോള്‍ ഓറഞ്ച് ക്യാപ് ഓപ്പൺര്‍മാരും വൺ ഡൗൺ ബാറ്റ്സ്മാന്മാരും ആണ് അര്‍ഹരാകുന്നതെന്നും മറ്റാരും ഈ സ്ഥാനത്തേക്ക് എത്താറില്ലെന്നും ഡി വില്ലിയേഴ്സ് പറഞ്ഞു.
