ബിസിസിഐ വിലക്ക് അവസാനിച്ച ശേഷം ക്രിക്കറ്റിലേക്ക് മടങ്ങിയെത്തുവാന്‍ തയ്യാറെടുക്കുന്ന ശ്രീശാന്ത് തന്റെ ഐപിഎല്‍ സ്വപ്നങ്ങളും പങ്കുവെച്ചിരുന്നു. ഇതില്‍ മുംബൈ ഇന്ത്യന്‍സിന് വേണ്ടി കളിക്കുവാനായാല്‍ അത് വളരെ മികച്ച കാര്യമായിരിക്കുമെന്നും ശ്രീശാന്ത് വ്യക്തമാക്കി.
ചില ടീമുകള്‍ തന്നെ സ്വന്തമാക്കുവാന്‍ ആഗ്രഹിക്കുന്നുണ്ടെന്ന് അടുത്തിടെ ശ്രീശാന്ത് വ്യക്തമാക്കിയിരുന്നു. അടുത്ത ഐപിഎല്‍ ലേലത്തില്‍ തന്റെ പേരും നല്‍കുവാന്‍ ഒരുങ്ങുകയാണ് മലയാളി താരം. രഞ്ജി സാധ്യത ലിസ്റ്റില്‍ ശ്രീശാന്തിനെയും കേരളം അടുത്തിടെ ഉള്‍പ്പെടുത്തിയിരുന്നു.
മുംബൈ ഇന്ത്യന്‍സ് പോലെ റോയല്‍ ചലഞ്ചേഴ്സ് ബാംഗ്ലൂര്‍, ചെന്നൈ സൂപ്പര്‍ കിംഗ്സ് എന്നീ ടീമുകള്‍ക്കായും കളിക്കുവാന്‍ തനിക്ക് താല്പര്യമുണ്ടെന്ന് ശ്രീശാന്ത് വെളിപ്പെടുത്തി. കിംഗ്സ് ഇലവന്‍ പഞ്ചാബ്, രാജസ്ഥാന്‍ റോയല്‍സ്, കൊച്ചി തസ്കേഴ്സ് കേരള എന്നിവയാണ് ശ്രീശാന്ത് ഐപിഎലില്‍ കളിച്ചിട്ടുള്ള ടീമുകള്‍.
മുംബൈ ഇന്ത്യന്‍സിന് കളിക്കുവാനുള്ള തന്റെ ആഗ്രഹത്തിന് പിന്നില്‍ സച്ചിനോടുള്ള ഇഷ്ടവും ബഹുമാനവുമാണെന്ന് ശ്രീശആന്ത് വ്യക്തമാക്കി. എന്നാല്‍ ലേലത്തില്‍ ഏത് ടീം തന്നെ സ്വന്തമാക്കിയാലും തനിക്ക് കളിക്കുവാന്‍ ആഗ്രഹമുണ്ടെന്നും ശ്രീശാന്ത് വ്യക്തമാക്കി. ധോണിയുടെ കീഴില്‍ ചെന്നൈയിലോ വിരാടിന് കീഴില്‍ ബാംഗ്ലൂരിലോ തനിക്ക് അവസരം ലഭിച്ചാലും സന്തോഷമേയുള്ളുവെന്ന് ശ്രീശാന്ത് അഭിപ്രായപ്പെട്ടു.
