പഞ്ചാബ് കിംഗ്സിനെതിരെ പടുകൂറ്റന്‍ സ്കോര്‍ നേടി ലക്നൗ സൂപ്പര്‍ ജയന്റ്സ്. മാര്‍ക്കസ് സ്റ്റോയിനിസ്, കൈൽ മയേഴ്സ് എന്നിവരുടെ അര്‍ദ്ധ ശതകങ്ങള്‍ക്കൊപ്പം ആയുഷ് ബദോനി, നിക്കോളസ് പൂരന്‍ എന്നിവരും ബാറ്റിംഗിൽ കസറിയപ്പോള്‍ 257/5 എന്ന പടുകൂറ്റന്‍ സ്കോറാണ് ലക്നൗ നേടിയത്.
12 റൺസ് നേടിയ കെഎൽ രാഹുലിനെ റബാഡ പുറത്താക്കുമ്പോള്‍ 3.2 ഓവറിൽ 41 റൺസാണ് ലക്നൗ നേടിയത്. കൈൽ മയേഴ്സ് തന്റെ അര്‍ദ്ധ ശതകം തികച്ച് അധികം വൈകാതെ കാഗിസോ റബാഡയ്ക്ക് വിക്കറ്റ് നൽകി മടങ്ങി. 24 പന്തിൽ 54 റൺസ് നേടിയ മയേഴ്സ് 7 ഫോറും 4 സിക്സും നേടി.
അരങ്ങേറ്റക്കാര്‍ ഗുര്‍ണൂര്‍ ബ്രാര്‍ എറിഞ്ഞ 8ാം ഓവറിൽ ബദോനിയും സ്റ്റോയിനിസും ചേര്‍ന്ന് 24 റൺസ് നേടിയപ്പോള്‍ ലക്നൗ സ്കോര്‍ നൂറ് കടക്കുകയായിരുന്നു. 24 പന്തിൽ 43 റൺസ് നേടിയ ആയുഷ് ബദോനിയും മാര്‍ക്കസ് സ്റ്റോയിനിസ് ചേര്‍ന്ന് 89 റൺസാണ് മൂന്നാം വിക്കറ്റിൽ നേടിയത്. ബദോനിയുടെ വിക്കറ്റ് ലിയാം ലിവിംഗ്സ്റ്റൺ ആണ് നേടിയത്. ആയുഷ് ബദോനി പുറത്തായ ശേഷം മാര്‍ക്കസ് സ്റ്റോയിനിസ് – നിക്കോളസ് പൂരന്‍ അതിവേഗം ബാറ്റിംഗ് നടത്തിയപ്പോള്‍ ലക്നൗ 16 ഓവറിൽ 200 റൺസ് നേടി.
40 പന്തിൽ 73 റൺസ് നേടിയ സ്റ്റോയിനിസ് അഞ്ച് സിക്സും ആറ് ഫോറും നേടിയപ്പോള്‍ 19ാം ഓവറിൽ സാം കറന് വിക്കറ്റ് നൽകി മടങ്ങുകയായിരുന്നു. 30 പന്തിൽ നിന്ന് 76 റൺസായിരുന്നു സ്റ്റോയിനിസ് – പൂരന്‍ കൂട്ടുകെട്ട് നേടിയത്. നിക്കോളസ് പൂരന്‍ 19 പന്തിൽ 45 റൺസ് നേടി അര്‍ഷ്ദീപിന് അവസാന ഓവറിൽ വിക്കറ്റ് നൽകി മടങ്ങി.
