ഓസ്‌ട്രേലിയൻ വനിതാ ടീമിനെതിരായ രണ്ടാം ഏകദിനത്തിൽ സ്മൃതി മന്ഥാനയുടെ തകർപ്പൻ സെഞ്ച്വറി മികവിൽ ഇന്ത്യൻ വനിതാ ടീം 292 റൺസ് നേടി. 91 പന്തിൽ 117 റൺസ് നേടിയ മന്ഥാന, 14 ഫോറുകളും 4 സിക്സറുകളും സഹിതം ഓസീസ് ബൗളിംഗിനെ തലങ്ങും വിലങ്ങും പ്രഹരിച്ചു.
പ്രതിക റാവലുമായി (25) ചേർന്ന് 70 റൺസിൻ്റെ മികച്ച കൂട്ടുകെട്ട് പടുത്തുയർത്തിയാണ് മന്ഥാന ഇന്ത്യയ്ക്ക് മികച്ച തുടക്കം നൽകിയത്. ഹർലീൻ ഡിയോൾ (10), ക്യാപ്റ്റൻ ഹർമൻപ്രീത് കൗർ (17) എന്നിവർ വേഗത്തിൽ പുറത്തായെങ്കിലും, ദീപ്തി ശർമ്മയുടെ (40) മികച്ച പ്രകടനവും റിച്ച ഘോഷിന്റെ (29) സംഭാവനയും ഇന്ത്യയെ തകർച്ചയിൽ നിന്ന് രക്ഷിച്ചു. അവസാന ഓവറുകളിൽ സ്നേഹ് റാണ (18 പന്തിൽ 24) നടത്തിയ വെടിക്കെട്ട് പ്രകടനം ഇന്ത്യയെ 300 റൺസിന് അടുത്തെത്തിച്ചു.
ഓസ്ട്രേലിയക്ക് വേണ്ടി ഡാർസി ബ്രൗൺ 42 റൺസിന് 3 വിക്കറ്റുകൾ നേടി. ആഷ്‌ലി ഗാർഡ്നർ 2 വിക്കറ്റുകൾ വീഴ്ത്തി. അതേസമയം, അന്നബെൽ സതർലാൻഡ്, മേഗൻ ഷട്ട്, ടഹ്ലിയ മഗ്രാത്ത് എന്നിവർ ഓരോ വിക്കറ്റ് വീതം സ്വന്തമാക്കി. 49.5 ഓവറിൽ ഇന്ത്യ 292 റൺസിന് പുറത്തായി.
