വരാനിരിക്കുന്ന വെസ്റ്റ് ഇൻഡീസിനെതിരായ ഏകദിന പരമ്പരയിൽ നിന്ന് ഇംഗ്ലണ്ട് ഫാസ്റ്റ് ബൗളർ ഗസ് അറ്റ്കിൻസണിനെ പരിക്ക് കാരണം ഒഴിവാക്കി. വലത് കാൽമുട്ടിലെ പേശിവലിവാണ് താരത്തിന് തിരിച്ചടിയായത്. സിംബാബ്‌വെക്കെതിരെ ട്രെന്റ് ബ്രിഡ്ജിൽ നടന്ന ടെസ്റ്റ് വിജയത്തിനിടെയാണ് അറ്റ്കിൻസണിന് പരിക്കേറ്റത്. അന്ന് അവസാന ദിവസം താരം മൂന്ന് ഓവറുകൾ മാത്രമാണ് പന്തെറിഞ്ഞത്.
ജൂൺ 20-ന് ഹെഡിംഗ്‌ലിയിൽ ആരംഭിക്കുന്ന ഇന്ത്യക്കെതിരായ ടെസ്റ്റ് പരമ്പരയ്ക്ക് അറ്റ്കിൻസൺ തയ്യാറാകുമോ എന്ന കാര്യത്തിൽ വലിയ സംശയമില്ലെങ്കിലും, ടീം റിസ്കെടുക്കാൻ തയ്യാറായില്ല. നിലവിൽ ഇംഗ്ലണ്ടിന്റെ മെഡിക്കൽ ടീമിന്റെ നിരീക്ഷണത്തിൽ താരം വിശ്രമത്തിലാണ്.
മാർക്ക് വുഡ്, ജോഫ്ര ആർച്ചർ എന്നിവരുൾപ്പെടെയുള്ള പ്രധാന താരങ്ങൾ ഇല്ലാത്തതിനാൽ ഇംഗ്ലണ്ടിന്റെ ഏറ്റവും പരിചയസമ്പന്നനായ പേസർ അറ്റ്കിൻസണായിരുന്നു. വ്യാഴാഴ്ച എഡ്ജ്ബാസ്റ്റണിൽ ആരംഭിക്കുന്ന മൂന്ന് മത്സരങ്ങളുള്ള ഏകദിന പരമ്പരയ്ക്കുള്ള ടീമിൽ അറ്റ്കിൻസണിന് പകരക്കാരനെ ഇതുവരെ പ്രഖ്യാപിച്ചിട്ടില്ല.
.
