ഓസ്‌ട്രേലിയയിൽ നടന്ന നിരാശാജനകമായ ആഷസ് പരമ്പരയിലെ സമ്പൂർണ്ണ തോൽവിക്ക് ശേഷം ഹീഥർ നൈറ്റിനെ പുറത്താക്കിയതിനെ തുടർന്ന് നാറ്റ് സിവെർ-ബ്രണ്ടിനെ ഇംഗ്ലണ്ട് വനിതാ ക്രിക്കറ്റ് ടീമിന്റെ പുതിയ ക്യാപ്റ്റനായി നിയമിച്ചു. ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ് ചൊവ്വാഴ്ച ഈ തീരുമാനം സ്ഥിരീകരിച്ചു. ജോൺ ലൂയിസിന് പകരം ഷാർലറ്റ് എഡ്വേർഡ്സിനെ പുതിയ മുഖ്യ പരിശീലകയായും നിയമിച്ചിട്ടുണ്ട്.
മുമ്പ് വൈസ് ക്യാപ്റ്റനായി സേവനമനുഷ്ഠിച്ചിട്ടുള്ള 32-കാരിയായ സിവെർ-ബ്രണ്ട് ദേശീയ ടീമിനെ നയിക്കുന്നതിൽ അഭിമാനം പ്രകടിപ്പിച്ചു. “ക്യാപ്റ്റൻ സ്ഥാനം ഏറ്റെടുക്കുന്നതിൽ ഞാൻ ശരിക്കും അഭിമാനിക്കുന്നു.” അവർ പറഞ്ഞു.
പരിചയസമ്പന്നയായ ഒരു ഓൾറൗണ്ടറായ സിവെർ-ബ്രണ്ട് 2013 ൽ അരങ്ങേറ്റം കുറിച്ചതു മുതൽ ഇംഗ്ലണ്ടിന്റെ പ്രധാന താരമാണ്. നിലവിൽ ഐസിസി ഏകദിന ബാറ്റിംഗ് റാങ്കിംഗിൽ മൂന്നാം സ്ഥാനത്തുള്ള അവർ എല്ലാ ഫോർമാറ്റുകളിലും സ്ഥിരതയാർന്ന പ്രകടനം കാഴ്ചവെച്ചിട്ടുണ്ട്. കൂടാതെ 180 ലധികം അന്താരാഷ്ട്ര വിക്കറ്റുകളും അവരുടെ പേരിലുണ്ട്.
മെയ് 21 ന് ആരംഭിക്കുന്ന വെസ്റ്റ് ഇൻഡീസിനെതിരായ പരിമിത ഓവർ പരമ്പരയോടെ ഇംഗ്ലണ്ട് വനിതകൾ അവരുടെ പുതിയ യുഗത്തിന് തുടക്കം കുറിക്കും. അതിനുശേഷം ഇന്ത്യയ്‌ക്കെതിരെ നാട്ടിൽ ഒരു പരമ്പരയും അവർ കളിക്കും.
