മാഞ്ചസ്റ്ററിലെ ഇംഗ്ലണ്ടിന്റെ വിജയത്തിലേക്കുള്ള കുതിപ്പിന് തടസ്സമായി മഴ. 23.3 ഓവറില്‍ 84/5 എന്ന നിലയില്‍ പരുങ്ങലിലായി നില്‍ക്കുമ്പോളാണ് മഴ വിന്‍ഡീസിന് ആശ്വാസമായി എത്തുന്നത്. 10/2 എന്ന നിലയില്‍ അഞ്ചാം ദിവസം കളി ആരംഭിച്ച വിന്‍ഡീസിന് സ്കോര്‍ 45ല്‍ നില്‍ക്കെ ക്രെയിഗ് ബ്രാത്‍വൈറ്റിനെ നഷ്ടമായി. സ്റ്റുവര്‍ട് ബ്രോഡ് തന്റെ അഞ്ഞൂറാം ടെസ്റ്റ് വിക്കറ്റും ഈ വിക്കറ്റ് നേട്ടത്തിലൂടെ സ്വന്തമാക്കി. 19 റണ്‍സാണ് ബ്രാത്‍വൈറ്റ് നേടിയത്.
സ്കോര്‍ 71 ല്‍ നില്‍ക്കവെ 31 റണ്‍സ് നേടിയ ഷായി ഹോപിനെ ക്രിസ് വോക്സ് പുറത്താക്കിയതോടെ വിന്‍ഡീസിന്റെ കാര്യം പരുങ്ങലിലായി. തന്റെ തൊട്ടടുത്ത ഓവറില്‍ ക്രിസ് വോക്സ് ഷമാര്‍ ബ്രൂക്സിനെയും മടക്കി. റോസ്ടണ്‍ ചേസ്(5*) ജെര്‍മൈന്‍ ബ്ലാക്ക്വുഡ്(3*) എന്നിവരാണ് വിന്‍ഡീസിനായി ക്രീസിലുള്ളത്.
